തിരുവനന്തപുരം: സംസ്ഥാനത്ത് ഇന്നും നാളെയും പകല് താപനില മൂന്നു ഡിഗ്രി സെല്ഷ്യല് വരെ ഉയരാനിടയുണ്ടെന്ന് മുന്നറിയിപ്പ്. തിരുവനന്തപുരം, ആലപ്പുഴ, കോട്ടയം, തൃശൂര്, കോഴിക്കോട്, കണ്ണൂര് എന്നീ ജില്ലകളില് ചൂട് കൂടാനിടയുണ്ടെന്നാണ് കേന്ദ്ര കാലാവസ്ഥ വകുപ്പിന്റെ അറിയിപ്പ്. ഇതിനെത്തുടര്ന്ന സംസ്ഥാന ദുരന്ത നിവാരണ അതോറിറ്റി ജാഗ്രതാ നിര്ദേശം പുറപ്പെടുവിച്ചു.
സംസ്ഥാനത്ത് വിവിധയിടങ്ങളില് പകല് ചൂട് 37 ഡിഗ്രി സെല്ഷ്യസിനെക്കാള് ഉയരുന്ന സാഹചര്യമാണുള്ളത്. കടലോര സംസ്ഥാനമായതിനാല് ഉയര്ന്ന അന്തരീക്ഷ ആര്ദ്രത താപസൂചിക ഉയര്ത്തുന്ന ഘടകമാണ്. സൂര്യതാപം, സൂര്യാഘാതം തുടങ്ങിയ ഗുരുതരമായ ആരോഗ്യ പ്രശ്നങ്ങളെ പ്രതിരോധിക്കുന്നതിന് ജാഗ്രത പാലിക്കണമെന്ന് അറിയിപ്പില് പറയുന്നു.
ധാരാളമായി വെള്ളം കുടിക്കുകയും എപ്പോഴും ഒരു ചെറിയ കുപ്പിയില് വെള്ളം കയ്യില് കരുതുകയും ചെയ്യണം. നിര്ജ്ജലീകരണം വര്ധിപ്പിക്കാന് ശേഷിയുള്ള മദ്യം പോലെയുള്ള പാനീയങ്ങള് പകല് സമയത്ത് ഒഴിവാക്കുക.
അയഞ്ഞ, ലൈറ്റ് കളര്, കട്ടി കുറഞ്ഞ പരുത്തി വസ്ത്രങ്ങള് ധരിക്കുക. വിദ്യാര്ത്ഥികളുടെ പരീക്ഷാക്കാലമായതിനാല് സ്കൂള് അധികൃതരും രക്ഷിതാക്കളും പ്രത്യേകശ്രദ്ധ പുലര്ത്തേണ്ടതുണ്ട്. ക്ലാസ് മുറികളില് വായുസഞ്ചാരം ഉറപ്പാക്കാനും കുട്ടികള്ക്ക് സ്കൂളിലും പരീക്ഷ ഹാളിലും ശുദ്ധജല ലഭ്യത ഉറപ്പാക്കാനും നിര്ബന്ധമായും ശ്രദ്ധിക്കണം.
അംഗനവാടി കുട്ടികള്ക്ക് ചൂട് ഏല്ക്കാത്ത തരത്തിലുള്ള സംവിധാനം നടപ്പാക്കാന് അതാത് പഞ്ചായത്ത് അധികൃതരും അംഗനവാടി ജീവനക്കാരും പ്രത്യേകം ശ്രദ്ധിക്കണം.
പ്രായമായവര്, ഗര്ഭിണികള്, കുട്ടികള്, മറ്റ് രോഗങ്ങള് മൂലമുള്ള അവശത അനുഭവിക്കുന്നവര് തുടങ്ങിയ വിഭാഗങ്ങള് പകല് 11 മണി മുതല് 3 മണി വരെ നേരിട്ട് സൂര്യപ്രകാശം ഏല്ക്കാതെയിരിക്കാന് പ്രത്യേകം ശ്രദ്ധിക്കണം. ഇത്തരം വിഭാഗങ്ങള്ക്ക് എളുപ്പത്തില് സൂര്യാഘാതം ഏല്ക്കാനുള്ള സാധ്യതയുള്ളതിനാല് ഇവരുടെ കാര്യത്തില് പ്രത്യേകശ്രദ്ധ പുലര്ത്തേണ്ടതാണ്.
പകല് സമയങ്ങളില് പുറത്തിറങ്ങുന്നവര് തൊപ്പിയോ കുടയോ ഉപയോഗിക്കാന് ശ്രദ്ധിക്കണം. നിര്മാണ തൊഴിലാളികള്, വഴിയോര കച്ചവടക്കാര്, ട്രാഫിക് പൊലീസുകാര്, മാധ്യമ റിപ്പോര്ട്ടര്മാര്, മോട്ടോര് വാഹന വകുപ്പിലെ വാഹന പരിശോധന വിഭാഗം, ഓണ്ലൈന് ഭക്ഷണ വിതരണക്കാര്, ഇരുചക്ര വാഹന യാത്രക്കാര്, കര്ഷകര്, കര്ഷക തൊഴിലാളികള് തുടങ്ങിയ നേരിട്ട് സൂര്യപ്രകാശം ഏല്ക്കുന്ന തൊഴിലുകളില് ഏര്പ്പെടുന്നവര് പകല് സമയങ്ങളില് തൊഴിലില് ഏര്പ്പെടുമ്പോള് ആവശ്യമായ വിശ്രമം എടുക്കാന് ശ്രദ്ധിക്കുകയും ധാരാളമായി വെള്ളം കുടിക്കുകയും ചെയ്യേണ്ടതാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
