ഈ ജില്ലകളിൽ ഇന്ന് ചൂട് നാല് ഡി​ഗ്രി വരെ ഉയരും; ജാ​​ഗ്രതാ നിർദേശം

തിരുവനന്തപുരം: കടുത്ത ചൂടിലുരുകുന്ന കേരളത്തിലെ ചില ജില്ലകളിൽ ഇന്ന് നാല് ഡി​ഗ്രി വരെ ചൂട് കൂടും. ആലപ്പുഴ, കോട്ടയം, പാലക്കാട്, കോഴിക്കോട് ജില്ലകളിലാണ് ഇന്നു നാല് ഡിഗ്രി വരെ ചൂട് ഉയരാനിടയുള്ളത്. നാളെയും മറ്റന്നാളും മൂന്ന് ഡിഗ്രി വരെ കൂടും. 

തിരുവനന്തപുരം, കൊല്ലം, പത്തനംതിട്ട, എറണാകുളം, തൃശൂർ, മലപ്പുറം, കണ്ണൂർ, കാസർകോട് ജില്ലകളിൽ ഇന്നു മുതൽ 28 വരെ മൂന്ന് ഡിഗ്രി വരെ ചൂട് കൂടുമെന്നും കാലാവസ്ഥാ വകുപ്പിന്റെ മുന്നറിയിപ്പ്.  

രേഖപ്പെടുത്തുന്ന ചൂടിനു പുറമേ അനുഭവപ്പെടുന്ന ചൂട് ആയ താപ തീവ്രത ഇന്നു കേരളത്തിലെ മിക്ക ജില്ലകളിലും 50 കടക്കുമെന്നാണ് കാലാവസ്ഥാ വകുപ്പിന്റെ നിഗമനം. ഇന്നലെ പാലക്കാട് മേഖലയിൽ മാത്രമാണ് 50നു മുകളിൽ താപ സൂചിക പ്രവചിച്ചിരുന്നതെങ്കിൽ ഇന്ന് കൊല്ലം മുതൽ കോഴിക്കോട് വരെ 50ന് മുകളിലെത്തും. പാലക്കാട്, തൃശൂർ മേഖലകളിൽ ഇത് 54നും മുകളിലെത്തുമെന്നും ആശങ്കയുണ്ട്.