തിരുവനന്തപുരം: ലോക്‌സഭാ തെരഞ്ഞെടുപ്പില്‍ തിരുവനന്തപുരത്ത് കുറഞ്ഞത് പതിനയ്യായിരം വോട്ടിന്റെ ഭൂരിപക്ഷത്തിന് എന്‍ഡിഎ സ്ഥാനാര്‍ഥി കുമ്മനം രാജശേഖരന്‍ ജയിക്കുമെന്ന് ബിജെപിയുടെ വിലയിരുത്തല്‍. കോണ്‍ഗ്രസ് അവകാശപ്പെടുന്ന ന്യൂനപക്ഷ ഏകീകരണം ഉള്‍പ്പെടെ എന്തൊക്കെ സംഭവിച്ചാലും കുമ്മനത്തിന്റെ ജയം തടയാനാവില്ലെന്നാണ് പാര്‍ട്ടി നേതാക്കള്‍ പറയുന്നത്.
യുഡിഎഫ് സ്ഥാനാര്‍ഥി ശശി തരൂരിന് അനുകൂലമായി ന്യൂനപക്ഷ ഏകീകരണം ഉണ്ടായെന്ന കോണ്‍ഗ്രസ് വാദം പൊള്ളയാണെന്നാണ് ബിജെപി നേതാക്കളുടെ പക്ഷം. അഥവാ അങ്ങനെയൊരു ഏകീകരണം നടന്നിട്ടുണ്ടെങ്കില്‍ത്തന്നെ അതിനെ മറികടക്കാവുന്ന മുന്നേറ്റം വട്ടിയൂര്‍ക്കാവ്, നേമം മണ്ഡലങ്ങളില്‍ ബിജെപിക്കുണ്ടാവുമെന്ന് അവര്‍ കണക്കുകൂട്ടുന്നു. കോവളം, നെയ്യാറ്റിന്‍കര മണ്ഡലങ്ങളിലാണ് കാര്യങ്ങള്‍ യുഡിഎഫിന് അനുകൂലമാവാന്‍ സാധ്യതയുള്ളത്. എന്നാല്‍ അതു കൊണ്‍ഗ്രസ് പ്രതീക്ഷിക്കുന്ന പോലെ വലിയ തരംഗമല്ല. അതേസമയം എതിരാളികളുടെ കണക്കുകൂട്ടലുകളെ കവച്ചുവയ്ക്കുന്ന വിധത്തിലുള്ള ഭൂരിപക്ഷം നേമത്തും വട്ടിയൂര്‍ക്കാവിലും കുമ്മനം രാജശേഖരനുണ്ടാവുമെന്ന് അവര്‍ പറയുന്നു. ഭൂരിപക്ഷം പതിനയ്യായിരത്തില്‍ കുറയില്ല എന്ന വിലയിരുത്തലിന്റെ അടിസ്ഥാനം ഈ രണ്ടു മണ്ഡലങ്ങളിലുണ്ടാവുന്ന മുന്നേറ്റമാണെന്ന് അവര്‍ സമ്മതിക്കുന്നുണ്ട്.
കഴിഞ്ഞ തെരഞ്ഞെടുപ്പുകളില്‍ നടന്നതുപോലെ ബിജെപി വിജയം തടയുന്നതിനുള്ള ക്രോസ് വോട്ടിങ് ഇക്കുറി തിരുവനന്തപുരത്ത് ഉണ്ടായിട്ടില്ലെന്നാണ് പാര്‍ട്ടി കണക്കാക്കുന്നത്. എല്‍ഡിഎഫ് വോട്ടുകള്‍ സി ദിവാകരനു തന്നെ വീഴുംവിധം ആയിരുന്നു പ്രചാരണം. എന്നാല്‍ ശബരിമല വിഷയത്തിലൂടെ ഉണ്ടായ വോട്ടുചോര്‍ച്ച മനസിലാക്കുന്നതില്‍ എല്‍ഡിഎഫ് ദയനീയമായി പരാജയപ്പെട്ടെന്നാണ് ബിജെപി നേതാക്കളുടെ പക്ഷം.
തിരുവനന്തപുരം ഉള്‍പ്പെടെ നാലു മണ്ഡലങ്ങളില്‍ ജയസാധ്യതയുണ്ടെന്ന് ബിജെപി വിലയിരുത്തുന്നുണ്ടെങ്കിലും കുമ്മനത്തിന്റേതു പോലെ ഉറച്ചതല്ല മറ്റിടങ്ങളിലെ സാഹചര്യമെന്ന് ബിജെപി നേതാക്കള്‍ സമ്മതിക്കുന്നു. പത്തനംതിട്ടയില്‍ ക്രിസ്ത്യന്‍ വോട്ടുകള്‍ ഏകീകരിക്കപ്പെട്ടെന്നാണ് പാര്‍ട്ടിയുടെ വിലയിരുത്തല്‍. ഇത് ആന്റോ ആന്റണിക്കാണ് ഗുണമായി വരിക. പൂഞ്ഞാര്‍, കാഞ്ഞിരപ്പള്ളി മേഖലകളില്‍ ആന്റോ നല്ല മുന്നേറ്റമുണ്ടാക്കും. അതിനെ മറികടക്കുന്ന വിധത്തില്‍ ഭൂരിപക്ഷ വോട്ടുകള്‍ ഏകീകരിക്കപ്പെട്ടെങ്കില്‍ മാത്രമേ കെ സുരേന്ദ്രനു ജയിക്കാനാവൂ. ഇക്കാര്യത്തില്‍ ഉറപ്പു പറയാന്‍ മാത്രമുള്ള വിവരങ്ങള്‍ ലഭിച്ചിട്ടില്ലെന്നാണ് ബിജെപി നേതാക്കള്‍ വ്യക്തമാക്കുന്നത്.
തൃശൂരില്‍ സുരേഷ് ഗോപി വലിയ മുന്നേറ്റമുണ്ടാക്കിയിട്ടുണ്ടെങ്കിലും അതു ജയത്തില്‍ എത്തുമെന്ന ഉറപ്പ് ബിജെപി നേതാക്കള്‍ പങ്കുവയ്ക്കുന്നില്ല. പത്തനംതിട്ടയിലും തൃശൂരും രണ്ടാമത് എത്തുമെന്നാണ് പാര്‍ട്ടിയിലെ ഒരു വിഭാഗം നേതാക്കള്‍ കണക്കുകൂട്ടുന്നത്. പാലക്കാട്ടും ആറ്റിങ്ങലിലും സമാനമായ മുന്നേറ്റം കൃഷ്ണകുമാറും ശോഭാ സുരേന്ദ്രനും കാഴച വയ്ക്കുമെന്നും അവര്‍ പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
