കെ എസ് യു സംസ്ഥാന പ്രസിഡന്റിന് കോവിഡ്; പരിശോധനക്ക് വ്യാജ മേൽവിലാസം നൽകിയെന്ന് പരാതി

തിരുവനന്തപുരം: കെ എസ് യു സംസ്ഥാന പ്രസിഡന്റ് കെ എം അഭിജിത്തിന് കോവിഡ് സ്ഥിരീകരിച്ചു. തിരുവനന്തപുരത്ത് സർക്കാരിനെതിരായ സമരങ്ങളിൽ പങ്കെടുത്ത അഭിജിത്തും സംസ്ഥാന സെക്രട്ടറി ബാഹുൽകൃഷ്ണയും കോവിഡ് പരിശോധന നടത്തിയപ്പോഴാണ് അഭിജിത്തിന് രോഗം സ്ഥിരീകരിച്ചത്. 

അഭിജിത്തും ബാഹുൽകൃഷ്ണയും പോത്തൻകോട് പഞ്ചായത്തിലെ തച്ചപ്പള്ളി എൽ പി സ്കൂളിൽ നടത്തിയ കോവിഡ് പരിശോധനയ്ക്കാണ് എത്തിയത്. ബാഹുൽകൃഷ്ണയുടെ പ്ലാമൂട്, തിരുവോണം എന്ന വിലാസമാണ് ഇരുവരും പരിശോധനയ്ക്ക് നൽകിയത്. സ്കൂളിൽ 48 പേരെ പരിശോധിച്ചപ്പോൾ 19 പേർക്ക് ഫലം പോസിറ്റീവായി. 

അതേസമയം കോവിഡ് പരിശോധനയ്ക്ക് അഭിജിത്ത് വ്യാജവിലാസമാണ് നൽകിയതെന്നു കാണിച്ച് പോത്തൻകോട് പഞ്ചായത്ത് പ്രസിഡന്റ് പൊലീസിൽ പരാതി നൽകി. പരിശോധനയ്ക്കെത്തിയ വ്യക്തി വ്യാജപേരും മേൽവിലാസവുമാണ് നൽകിയതെന്നും ഇയാളെ കണ്ടെത്താൻ നടപടികൾ സ്വീകരിക്കണമെന്ന് പോത്തൻകോട് പഞ്ചായത്ത് പ്രസിഡന്റ്‌ കെ വേണുഗോപാലൻ നായർ പൊലീസിന് നൽകിയ പരാതിയിൽ ആവശ്യപ്പെടുകയായിരുന്നു.

ഇതിനിടെയാണ് രാത്രി വൈകി ആ വ്യക്തി കെ.എസ്.യു സംസ്ഥാന പ്രസിഡന്റ് കെ എം അഭിജിത്താണെന്ന് തിരിച്ചറിഞ്ഞു. താൻ പരിശോധന നടത്തി എന്നും കോവിഡ് പോസിറ്റീവാണെന്നും അഭിജിത്തും സമ്മതിച്ചു. സെക്രട്ടേറിയറ്റിനു മുന്നിലെ നിരവധി സമരങ്ങളിൽ അഭിജിത്ത് പങ്കെടുത്തതായി സൂചനയുണ്ട്.