ന്യൂഡല്‍ഹി : കോവിഡ് വ്യാപനം കണക്കിലെടുത്ത് റെഡ്, ഓറഞ്ച്, ഗ്രീന്‍ സോണുകളുടെ പട്ടിക പുറത്തുവിട്ടു. ഇതില്‍ കേരളത്തിലെ രണ്ടു ജില്ലകള്‍ റെഡ് സോണിലും രണ്ടു ജില്ലകള്‍ ഗ്രീന്‍ സോണിലും ഉള്‍പ്പെട്ടു. കോട്ടയവും കണ്ണൂരുമാണ് റെഡ് സോണ്‍ ( തീവ്രബാധിത മേഖല) പട്ടികയില്‍ ഉള്‍പ്പെട്ടത്.
എറണാകുളം, വയനാട് ജില്ലകളാണ് ഗ്രീന്‍ സോണ്‍ ( കോവിഡ് മുക്തം ) പട്ടികയില്‍ ഉള്‍പ്പെട്ടത്. രാജ്യത്താകെ 319 ജില്ലകളാണ് ഗ്രീന്‍ സോണിലുള്ളത്. സംസ്ഥാനത്തെ ശേഷിക്കുന്ന 10 ജില്ലകളും ഓറഞ്ച് പട്ടികയിലാണ് ഉള്‍പ്പെടുത്തിയിട്ടുള്ളത്.
കേരളം പുറത്തിറക്കിയതില്‍ നിന്നും വിഭിന്നമാണ് കേന്ദ്ര ആരോഗ്യമന്ത്രാലയം പുറത്തുവിട്ട പുതിയ പട്ടിക. കേരളം നേരത്തെ സംസ്ഥാനത്തെ ആറു ജില്ലകളെ റെഡ് സോണിലും ശേഷിക്കുന്നവയെ ഓറഞ്ച് എ, ബി സോണുകളിലുമാണ് ഉള്‍പ്പെടുത്തിയത്.
ഗ്രീന്‍ സോണുകളാക്കിയിരുന്ന ഇടുക്കിയും കോട്ടയവും കൂടുതല്‍ കോവിഡ് കേസുകള്‍ റിപ്പോര്‍ട്ട് ചെയ്തതോടെ റെഡ് സോണിലേക്ക് മാറ്റുകയായിരുന്നു. ഗ്രീന്‍ സോണിലാക്കിയ ജില്ലകളില്‍ നിയന്ത്രണങ്ങളില്‍ ഇളവ് വരുത്തിയതാണ് പെട്ടെന്ന് രോഗവ്യാപനം കൂടാന്‍ ഇടയാക്കിയതെന്ന വിമര്‍ശനവും ഉയര്‍ന്നിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
