ന്യൂഡല്‍ഹി: കോവിഡ് പശ്ചാത്തലത്തില്‍ വിവിധ മെഡിക്കല്‍ കോളജുകളില്‍ അവസാന വര്‍ഷ പിജി ക്ക് പഠിക്കുന്നവരുടെ കോഴ്‌സ് കാലാവധി പുതിയ ബാച്ച് വരുന്നതു വരെ നീട്ടിയതായി മെഡിക്കല്‍ കൗണ്‍സില്‍ ഓഫ് ഇന്ത്യ ആരോഗ്യ സര്‍വകലാശാലയെയും സര്‍ക്കാരിനെയും അറിയിച്ചു. മെഡിക്കല്‍ പിജി കോഴ്‌സുകള്‍ അവസാനിക്കേണ്ടത് ഈ മാസം 30 ന് ആണ്.
കോഴ്‌സ് ദീര്‍ഘിപ്പിച്ച കാലയളവില്‍ ഇവര്‍ക്കുള്ള സ്‌റ്റൈപ്പന്‍ഡ് തുകയും താമസ സൗകര്യവും നല്‍കണം. മേയ് 2 ന് പുതിയ പിജി കോഴ്‌സ് തുടങ്ങണം. എന്നാല്‍ കോവിഡ് മൂലം പുതിയ ബാച്ചിന്റെ പ്രവേശന നടപടികള്‍ പൂര്‍ത്തിയായിട്ടില്ല.
ഈ സാഹചര്യത്തില്‍ ആശുപത്രികളില്‍ കോവിഡ് നേരിടുന്നതിനുള്ള ഡോക്ടര്‍മാര്‍ ആവശ്യത്തിന് ഇല്ലാതെ വരുന്നത് ഒഴിവാക്കാനാണു നിലവിലുള്ളവരുടെ കാലാവധി നീട്ടാന്‍ മെഡിക്കല്‍ കൗണ്‍സില്‍ തീരുമാനിച്ചത്.
മൂന്നു വര്‍ഷത്തെ പിജി കോഴ്‌സിന്റെ കാലാവധി ഇതു മൂലം നീളും. ഇവരുടെ പരീക്ഷ 29 ന് തുടങ്ങാനാണു നേരത്തെ ആരോഗ്യ സര്‍വകലാശാല തീരുമാനിച്ചിരുന്നത്. ഇപ്പോഴത്തെ സാഹചര്യത്തില്‍ ഇത് എന്നു സാധിക്കുമെന്ന് വ്യക്തമല്ല.
ജോലിക്കിടെ അവസാന വര്‍ഷ പരീക്ഷയ്ക്കും പിജി വിദ്യാര്‍ഥികള്‍ തയാറെടുക്കുന്നു. സ്ഥിതി മെച്ചപ്പെടുമ്പോള്‍ പരീക്ഷ നടത്തണമെന്നു മെഡിക്കല്‍ കൗണ്‍സില്‍ നിര്‍ദേശിച്ചിട്ടുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
