കോൺ​ഗ്രസിനെ നയിക്കാൻ ഇനി പുതുനേതൃത്വം, കെപിസിസി അധ്യക്ഷനായി മുല്ലപ്പള്ളി രാമചന്ദ്രൻ ഇന്ന് സ്ഥാനമേൽക്കും

തിരുവനന്തപുരം: കെപിസിസിയുടെ പുതിയ അധ്യക്ഷനായി മുല്ലപ്പള്ളി രാമചന്ദ്രൻ ഇന്ന്  സ്ഥാനമേല്‍ക്കും. വർക്കിം​ഗ് പ്രസിഡന്റുമാരായി കെ സുധാകരൻ, എംഐ ഷാനവാസ്, കൊടിക്കുന്നിൽ സുരേഷ് എന്നിവരും ഇന്ന് ചുമതലയേൽക്കും. ഉച്ചയ്ക്ക് 12 ന് ഇന്ദിരാ ഭവനിൽ എംഎം ഹസ്സനിൽ നിന്നാണ് മുല്ലപ്പള്ളി രാമചന്ദ്രൻ ചുമതലയേറ്റെടുക്കുന്നത്. മുതിർന്ന കോൺ​ഗ്രസ് നേതാക്കളായ എ.കെ.ആന്‍റണി, ഉമ്മൻചാണ്ടി, രമേശ് ചെന്നിത്തല തുടങ്ങിയവർ ചടങ്ങില്‍ പങ്കെടുക്കും.

യുഡിഎഫ് കൺവിനറായി ബെന്നി ബഹനാനും ഇന്ന് ചുമതലയേൽക്കും. വൈകീട്ട് മൂന്നു മണിയ്ക്ക് കന്റോൺമെന്റ് ഹൗസിൽ ചേരുന്ന യുഡിഎഫ് നേതൃയോ​ഗത്തിലാണ് ബെന്നി ബഹനാൻ ഔദ്യോ​ഗികമായി ചുമതലയേൽക്കുക. ഇന്ന് കെപിസിസി രാഷ്ട്രീയകാര്യ സമിതിയും ചേരുന്നുണ്ട്. മുല്ലപ്പള്ളി കെപിസിസി പ്രസിഡന്റായശേഷം ചേരുന്ന ആദ്യ രാഷ്ട്രീയകാരിയ സമിതി യോ​ഗമാണിത്.