ചെങ്ങന്നൂരിൽ വി​ഗ്രഹ നിർമാണശാലയിൽ ആക്രമണം; രണ്ട് കോടിയുടെ പഞ്ചലോഹ​ വി​ഗ്രഹം കവർന്നു

ആലപ്പുഴ: ചെങ്ങന്നൂരിലെ വിഗ്രഹ നിർമാണശാല ആക്രമിച്ച് രണ്ട് കോടി രൂപയുടെ പഞ്ചലോഹ വിഗ്രഹം കവർന്നു. ലണ്ടനിലെ ക്ഷേത്രത്തിൽ പ്രതിഷ്ഠിക്കാനായി നിർമ്മിച്ച 60 കിലോ തൂക്കമുള്ള അയ്യപ്പ വിഗ്രഹമാണ് അക്രമികൾ കവർന്നത്.  

ഇന്നലെ രാത്രി ഒമ്പതരയോടെയാണ് സംഭവം. ബൈക്കിലെത്തിയ സംഘം തൊഴിലാളികളെ മർദ്ദിച്ച് അവശരാക്കിയ ശേഷം വിഗ്രഹം കൊണ്ടു പോകുകയായിരുന്നു എന്ന് ഉടമകൾ പറഞ്ഞു.

സ്ഥാപനത്തിൽ മുമ്പ് ജോലി ചെയ്തിരുന്ന ആളുടെ നേതൃത്വത്തിലായിരുന്നു ആക്രമണം എന്നാണ് വിവരം. തൊഴിൽ തർക്കമാണ് സംഭവത്തിനു പിന്നിലെന്നാണ് പൊലീസിന്റെ സംശയം. അന്വേഷണം ഊർജിതമാക്കിയതായി പൊലീസ് വ്യക്തമാക്കി.