നിത്യ വരുമാനം 50 രൂപ, കളഞ്ഞുകിട്ടിയ 15,000 രൂപ തിരികെ ഏല്‍പ്പിച്ച് എണ്‍പതുകാരി; നന്മ

ആലപ്പുഴ: 50 രൂപ നിത്യവരുമാനം മാത്രമുള്ള വയോധിക വഴിയില്‍ കിടന്നു കിട്ടിയ 15000 രൂപ ഉടമയ്ക്കു കൈമാറി . എടത്വ 18ല്‍ ചിറ സരസ്വതിയമ്മ (80) ആണ് മാതൃകയായത്.തലവടി കൈപ്പള്ളിമാലില്‍ ശാന്തമ്മയ്ക്കാണ് അവരുടെ നഷ്ടപ്പെട്ട പണം സരസ്വതിയമ്മ തിരികെ നല്‍കിയത്. എടത്വ കോളജിനു സമീപം ചെറിയ മുറുക്കാന്‍കട നടത്തിയാണ് സരസ്വതിയമ്മ ജീവിക്കുന്നത്. വെള്ളിയാഴ്ച എടത്വ മാര്‍ക്കറ്റില്‍ നിന്നാണ് പണം അടങ്ങിയ പൊതി സരസ്വതിയമ്മയ്ക്കു ലഭിച്ചത്. 

പണമാണെന്നു മനസിലായപ്പോള്‍ എണ്ണാന്‍ പോലും നില്‍ക്കാതെ സമീപത്തെ എ.കെ.ബനാന സ്റ്റാള്‍ ഉടമയെ ഏല്‍പ്പിച്ചു. ഇന്നലെ പണം നഷ്ടപ്പെട്ട ശാന്തമ്മ അന്വേഷിച്ചു വന്നപ്പോള്‍ തുക കൈമാറുകയായിരുന്നു. ബാങ്കില്‍ നിന്നു പണമെടുത്ത് മടങ്ങും വഴിയാണ് പൊതി നഷ്ടപ്പെട്ടത്. പ്രതിഫലം നല്‍കിയെങ്കിലും അവര്‍ വാങ്ങിയില്ല.