പടിവാതിൽക്കൽ പട്ടിണി ; നിലയില്ലാക്കയത്തിൽ 'കൈ പിടിച്ച്' ഭാ​ഗ്യദേവത ; 75 ലക്ഷം സമ്മാനം

തിരുവനന്തപുരം : കോവിഡ് വ്യാപനവും ലോക്ക്ഡൗണും മൂലം ജീവിതം വഴിമുട്ടിയ കുടുംബത്തിന് അപ്രതീക്ഷിത കൈത്താങ്ങായി ഭാ​ഗ്യദേവതയെത്തി.  പട്ടിണിയുടെ കയത്തിലായ മുരുക്കുംപുഴ മുണ്ടയ്ക്കൽ സുമാ കോട്ടേജിൽ ബാബുവിനെയാണ്  ഭാഗ്യദേവത കടാക്ഷിച്ചത്. 

ഇന്നലെ നറുക്കെടുപ്പു നടന്ന സ്ത്രീശക്തി (എസ് കെ 447584 ) ഭാഗ്യക്കുറി ഒന്നാം സമ്മാനമായ 75 ലക്ഷം രൂപയാണ് ബാബുവിന് ലഭിച്ചത്.  കണിയാപുരം ഭഗവതി എജൻസിയിൽ നിന്നു ചെറുകിട ഏജന്റായ കണ്ണൻ എടുത്തു വിറ്റ ടിക്കറ്റാണിത്.

ചുമട്ടു തൊഴിലാളിയായിരുന്ന ബാബു വർഷങ്ങൾക്കു മുൻപ് വാഹന അപകടത്തിൽപ്പെട്ടതോടെ മറ്റു ജോലിക്കൊന്നും പോകാനാകാനാകാത്ത സ്ഥിതിയിലായി.  ഇതോടെ ആറ്റിൻകുഴിയിൽ ചെറുകിട ഭാഗ്യക്കുറി കച്ചവടവും തുടങ്ങി.  ലോക് ഡൗൺ വന്നതോടെ ലോട്ടറി കച്ചവടവും നിലച്ചു.    

ഈ ദുരിതത്തിനിടെ എടുത്ത ടിക്കറ്റാണ് ബാബുവിനെ ലക്ഷാധിപതിയാക്കിയത്. സുമയാണ് ബാബുവിന്റെ ഭാര്യ. അനന്തലക്ഷ്മി, അനന്തകൃഷ്ണൻ, ആനന്ദകൃഷ്ണൻ എന്നിവർ മക്കളാണ്.