ബീഡി വലിച്ചത് തടഞ്ഞു; അമ്മയെ കല്ലു കൊണ്ടടിച്ച് വീഴ്ത്തി മകന്‍

തിരുവനന്തപുരം: ബീഡി വലിച്ചതു തടഞ്ഞ അമ്മയെ മാനസികാസ്വാസ്ഥ്യമുള്ള മകന്‍ കല്ലു കൊണ്ടു തലയ്ക്കടിച്ചു വീഴ്ത്തി. ഐരാണിമുട്ടം  സ്വദേശിനിക്കാണ് അടിയേറ്റത്. ഗുരുതര പരുക്കേറ്റ ഇവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. സര്‍ജറി ഐസിയുവില്‍ കഴിയുന്ന ഇവരുടെ തലച്ചോറില്‍ നിന്നു രക്തസ്രാവമുണ്ട്.

ഇന്നലെ രാവിലെ 11നായിരുന്നു സംഭവം. പുകവലിച്ചതു തടഞ്ഞ അമ്മ  മകന്റെ ബീഡി പിടിച്ചു വാങ്ങി. പിന്നീട് ബീഡി ആവശ്യപ്പെട്ട് ബഹളം വച്ച മകന്‍ അടയ്ക്ക ചതയ്ക്കുന്ന കല്ലെടുത്തു ആക്രമിക്കുകയായിരുന്നു.

ഇടതുകണ്ണിനും എല്ലുകള്‍ക്കും സാരമായി പരുക്കേറ്റെന്നും ആശുപത്രി അധികൃതര്‍ പറഞ്ഞു. മകനെ  ഫോര്‍ട്ട് പൊലീസ് കസ്റ്റഡിയിലെടുത്തു. അക്രമം തടയാന്‍ ശ്രമിച്ച വീട്ടിലെ ജോലിക്കാരിക്കും മര്‍ദനമേറ്റു.