രാത്രി സമയത്ത് ടയര് പഞ്ചറായി വഴിയില് കുടുങ്ങിയാല് സഹായത്തിനെത്തും; ഇനി 'നിഴലാ'യി കൂട്ടിനുണ്ട് കേരളാ പൊലീസ്
തിരുവനന്തപുരം: ഏതെങ്കിലും സാഹചര്യത്തില് അസമയത്ത് വഴിയില് ഒറ്റപ്പെട്ടുപോകുന്ന വനിതായാത്രക്കാര്ക്കും മുതിര്ന്ന പൗരന്മാര്ക്കും സുരക്ഷ ഒരുക്കാന് കേരള പൊലീസ്. ഏത് അടിയന്തിര സാഹചര്യത്തിലും ആവശ്യമായ സഹായം എത്തിക്കുന്നതിന് തിരുവനന്തപുരത്ത് പൊലീസ് ആസ്ഥാനത്ത് പൊലീസ് കമാന്റ് സെന്ററില് പ്രത്യേക സംവിധാനം നിലവില് വന്നു. നിഴല് എന്ന് പേരിട്ടിരിക്കുന്ന ഈ സംവിധാനത്തിലേയ്ക്ക് കേരളത്തിലെ എല്ലാ ജില്ലയില് നിന്നും ഏത് സമയവും ഫോണ് മുഖേന ബന്ധപ്പെടാവുന്നതാണ്.
112 എന്ന നമ്പരിലേക്ക് വിളിച്ച് സഹായം അഭ്യര്ത്ഥിക്കുന്നവര്ക്ക് വിളിപ്പുറത്ത് കേരള പൊലീസ് സഹായവുമായി എത്തും. രാത്രിസമയങ്ങളില് വാഹനം കേടാവുകയും ടയര് പഞ്ചറാവുകയും ചെയ്യുന്നത് മൂലം വഴിയില് കുടുങ്ങിയ വനിതാ യാത്രക്കാര്ക്കും മുതിര്ന്ന പൗരന്മാര്ക്കും ഈ നമ്പരിലേക്ക് വിളിക്കാം.
രാത്രി ഒറ്റയ്ക്ക് സഞ്ചരിക്കുന്ന വനിതകള്ക്ക് പൊലീസ് സഹായം എത്തിക്കാനും ഈ സംവിധാനം വഴി സാധിക്കും. ഒറ്റയ്ക്ക് താമസിക്കുന്ന സ്ത്രീകള്ക്കും മുതിര്ന്ന പൗരന്മാര്ക്കും ഏത് ആവശ്യത്തിനും ഏത് സമയത്തും ഈ സൗകര്യം വിനിയോഗിക്കാവുന്നതാണ്.
പൊലീസ് ആസ്ഥാനത്ത് 24 മണിക്കൂറും പ്രവര്ത്തിക്കുന്ന കമാന്റ് സെന്ററിലാണ് നിഴല് പദ്ധതിയുടെ ഏകോപനം. കമാന്റ് സെന്ററില് വരുന്ന ഓരോ കോളുകളും ട്രെയ്സ് ചെയ്യുന്നതിനുള്ള സൗകര്യങ്ങളുണ്ട്. വിളിക്കുന്നയാള് ഉള്ള സ്ഥലം ആധുനിക സാങ്കേതികവിദ്യയുടെ സഹായത്തോടെ കൃത്യമായി മനസിലാക്കാന് കമാന്റ് സെന്ററിന് കഴിയും. ഇവിടേക്ക് സഹായമെത്തിക്കാനും പൊലീസിന് സാധിക്കും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
