ലോക്ക്ഡൗണിനിടെ റിട്ടയേർഡ് കോളജ് അധ്യാപകന്റെ വീട്ടിൽ അതിക്രമിച്ച് കയറി മൂന്നം​ഗ സംഘം; കാറുകൾ തല്ലിത്തകർത്തു

കായംകുളം: റിട്ടയേർഡ് കോളജ് അധ്യാപകൻ്റെ വീട്ടിൽ അതിക്രമിച്ച് കയറി മൂന്നംഗ സംഘം. വീട്ടിൽ അതിക്രമിച്ച് കയറിയ സംഘം കാറുകൾ തല്ലിതകർത്തു. എംഎസ്എം കോളജ് വൈസ് പ്രിൻസിപ്പലായി വിരമിച്ച കുറ്റിത്തെരുവ് പട്ടിരേത്ത് സോമനാഥപിള്ളയുടെ വീട്ടിലായിരുന്നു സംഭവം. 

ഇന്ന് വൈകിട്ട് മൂന്ന് മണിയോടെയാണ് അക്രമം നടന്നത്. ബൈക്കിൽ എത്തിയ മൂന്നംഗം സംഘമാണ് ആക്രമണം നടത്തിയത്. വീടിൻ്റെ പോർച്ചിൽ കിടന്ന ഇന്നോവ കാറും, വീടിന് മുൻപിൽ റോഡിൽ കിടന്ന സുഹൃത്തിൻ്റെ ഫോക്സ് വാഗൺ കാറുമാണ് തല്ലിതകർത്തത്. ഇരു വാഹനങ്ങളുടെയും ഗ്ലാസുകൾ തകർത്തു. 

സംഘത്തിൽപ്പെട്ടവർ മുഖം മറച്ചിരുന്നതായി വീട്ടുകാർ പറയുന്നു. മീറ്റർ പലിശ ഇടപാടുമായി ബന്ധപ്പെട്ട സംഘമാണ് ആക്രമണം നടത്തിയതെന്ന് സംശയിക്കുന്നതായി പൊലീസ് പറയുന്നു.