തിരുവനന്തപുരം: വായു ചുഴലിക്കാറ്റിനെ തുടര്‍ന്ന് കേരളത്തില്‍ ശക്തമായ കാറ്റിനും, കടല്‍ക്ഷോഭത്തിനും സാധ്യതയെന്ന് മുന്നറിയിപ്പ്. കേരളം, കര്‍ണാടക, ലക്ഷദ്വീപ് തീരത്ത് 50 കിലോമീറ്റര്‍ വരെ വേഗത്തില്‍ കാറ്റടിക്കാന്‍ സാധ്യത.
വ്യാഴാഴ്ച ഉച്ചയോടെ വായു ചുഴലിക്കാറ്റ് ഗുജറാത്തിലെ ദ്വാരകയ്ക്കും വെരാവലിനുമിടയില്‍ കര തൊടും. 180 കീലോമീറ്റര്‍ വേഗതയില്‍ വരെ ഇവിടെ കാറ്റ് വീശുമെന്നാണ് കണക്കാക്കപ്പെടുന്നത്. വായു ചുഴലിക്കാറ്റിന്റെ ഫലമായി വ്യാഴാഴ്ച രാത്രി 11.30 വരെ കാസര്‍കോഡ് മുതല്‍ പൊഴിയൂര്‍ വരെയുള്ള കേരള തീരത്ത് തിരമാലകള്‍ രണ്ടര മുതല്‍ മൂന്നര മീറ്റര്‍ വരെ ഉയരുമെന്നും മുന്നറിയിപ്പുണ്ട്.
അതിശക്തമായ മഴ ലഭിക്കാന്‍ സാധ്യതയുള്ളതിനാല്‍ മലപ്പുറം ജില്ലയില്‍ ഓറഞ്ച് അലേര്‍ട്ട് പ്രഖ്യാപിച്ചിട്ടുണ്ട്. എറണാകുളം, തൃശൂര്‍, കോഴിക്കോട്, കണ്ണൂര്‍, ആലപ്പുഴ, കാസര്‍കോട് ജില്ലകളില്‍ യെല്ലോ അലേര്‍ട്ടും പ്രഖ്യാപിച്ചിട്ടുണ്ട്. ഈ മാസം 16 വരെ സംസ്ഥാനത്ത് കനത്ത മഴ തുടരുമെന്നാണ് കാലാവസ്ഥാ പ്രവചനം.
ബുധനാഴ്ച സംസ്ഥാനത്തെ മിക്കയിടങ്ങളിലും കനത്ത മഴ ലഭിച്ചു. കോഴിക്കോടും വടകരയിലുമാണ് കൂടുതല്‍ മഴ ലഭിച്ചത്, 10 സെന്റീമീറ്റര്‍ വീതം. തൃശൂര്‍ നാമക്കലില്‍ 9 സെന്റീമീറ്റര്‍ മഴ ലഭിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
