പാർലമെന്റ് വെർച്വൽ മീറ്റിംഗിൽ എം പി ന​ഗ്നനായി എത്തി; പിശക് പറ്റിയതെന്ന് ക്യൂബെക്ക് പ്രതിനിധി 

ഒട്ടാവ: കാനഡയിലെ പാർലമെന്റ് അംഗങ്ങളുടെ വെർച്വൽ മീറ്റിംഗിൽ എം പി ന​ഗ്നനായി എത്തി. വില്യം ആമോസ് എന്നയാളാണ് സഹ നിയമനിർമ്മാതാക്കളുടെ സ്‌ക്രീനിൽ ന​ഗ്നനായി പ്രത്യക്ഷപ്പെട്ടത്. 2015 മുതൽ ക്യൂബെക്ക് ജില്ലയായ പോണ്ടിയാക്കിനെ പ്രതിനിധീകരിക്കുന്ന വ്യക്തിയാണ് വില്യം.

കോവിഡ് സാഹചര്യമായതിനാലാണ്  പാർലമെന്റ് അംഗങ്ങൾ വിഡിയോ കോൺഫറൻസിലൂടെ ചർച്ചകൾ നടത്തുന്നത്. ക്യൂബെക്കിന്റെയും കാനഡയുടെയും പതാകകൾക്ക് പുറകിലായി നിൽക്കുന്ന വില്യത്തിന്റെ ഒരു സ്ക്രീൻഷോട്ട് കനേഡിയൻ പ്രസ്സ് പുറത്തുവിട്ടു. മൊബൈൽ ഫോൺ ഉപയോ​ഗിച്ച്  സ്വകാര്യ ഭാഗങ്ങൾ മറച്ചുപിടിച്ചിരിക്കുന്നതാണ് സ്ക്രീൻഷോട്ടിലുള്ളത്. 

“അത് ഒരു നിർഭാഗ്യകരമായ പിശകായിരുന്നു”, സംഭവത്തോട് വില്യം പ്രതികരിച്ചതിങ്ങനെ. വ്യായാമത്തിന് ശേഷം മടങ്ങിയെത്തി വസ്ത്രം മാറുന്നതിനിടയിൽ വിഡിയോ അറിയാതെ ഓൺ ആയി. എന്റെ സഹപ്രവർത്തകരോട് ആത്മാർത്ഥമായി ക്ഷമ ചോദിക്കുന്നു", സംഭവത്തെക്കുറിച്ച് വില്യം വിശദീകരണം നൽകി.