ബം​ഗ്ലാദേശിൽ ഹിന്ദുമത നേതാവിനെ നാലം​ഗ സംഘം തട്ടിക്കൊണ്ടു പോയി കൊന്നു

ധാക്ക: ബം​​ഗ്ലാദേശിൽ ഹിന്ദുമത നേതാവിനെ വീട്ടിൽ നിന്നു തട്ടിക്കൊണ്ടു പോയി കൊലപ്പെടുത്തി. വടക്കൻ ബം​ഗ്ലാദേശിലെ ദിനാജ്പുരിലാണ് സംഭവം. ഭാബേഷ് ചന്ദ്ര റോയിയാണ് കൊല്ലപ്പെട്ടത്. ധാക്കയിൽ നിന്നു 330 കിലോമീറ്റർ അകലെയുള്ള ബസുദേബ്പുർ ​ഗ്രാമത്തിൽ നിന്നു വ്യാഴാഴ്ച രാത്രിയാണ് ഭാബേഷ് ചന്ദ്രയെ ​ഗുരുതര പരിക്കുകളുമായി കണ്ടെത്തിയത്. പിന്നാലെ ആശുപത്രിയിൽ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു.

തട്ടിക്കൊണ്ടു പോകുന്നതിനു അര മണിക്കൂർ മുൻപ് ഭാബേഷ് ചന്ദ്രയ്ക്ക് ഒരു ഫോൺ വന്നിരുന്നു. പിന്നാലെയാണ് 4 പേർ രണ്ട് ബൈക്കുകളിലെത്തി ഭാബേഷിനെ തട്ടിക്കൊണ്ടു പോയതെന്നു അദ്ദേഹത്തിന്റെ ഭാര്യ ശാന്തന വെളിപ്പെടുത്തി. റോയിയെ നരബരി ​ഗ്രാമത്തിലെത്തിച്ചാണ് സംഘം ആക്രമിച്ചത്.

ബം​ഗ്ലാദേശിലെ പൂജ ഉദ്ജപൻ പരിഷത്തിന്റെ ബിരാൽ യൂണിറ്റ് വൈസ് പ്രസിഡന്റാണ് ഭാബേഷ് ചന്ദ്ര റോയ്. ബം​ഗ്ലാദേശിലെ പ്രാദേശിക ഹിന്ദു നേതാക്കളിൽ പ്രമുഖനായിരുന്നു അദ്ദേഹം.

'ട്രാൻസ് വനിതകൾ സ്ത്രീകൾ അല്ല'; സി​ഗരറ്റ് വലിച്ച് മദ്യ ​ഗ്ലാസും പിടിച്ച് സന്തോഷം പങ്കുവച്ച് ജെ കെ റൗളിങ്

സംഭവത്തിൽ കേസ് ഫയൽ ചെയ്യുന്നതിനുള്ള നടപടിക്രമങ്ങൾ പുരോ​ഗമിക്കുകയാണെന്നു ബിരാൽ പൊലീസ് സ്റ്റേഷൻ ചുമതലയുള്ള ഓഫീസർ അബ്ദുസ് സബൂർ വ്യക്തമാക്കി. പ്രതികളെ തിരിച്ചറിയാനും പിടികൂടാനുമായി അന്വേഷണം ഊർജിതമായി നടക്കുകയാണെന്നും അദ്ദേഹം പ്രതികരിച്ചു.

അതിനിടെ ന്യൂനപക്ഷമായ ഹിന്ദു സമുദായക്കാർക്കെതിരെ നടക്കുന്ന അതിക്രമങ്ങളുമായി ബന്ധപ്പെട്ട ബം​ഗ്ലാദേശിന്റെ വിശദീകരണങ്ങൾ ഇന്ത്യൻ വിദേശകാര്യ മന്ത്രാലയം തള്ളി. ബം​ഗ്ലാദേശിലെ ന്യൂനപക്ഷ പീഡനങ്ങൾ മറച്ചു വയ്ക്കാനുള്ള നീക്കം വഞ്ചനാപരമാണെന്നു ഇന്ത്യ പ്രതികരിച്ചു. കുറ്റവാളികൾ സ്വതന്ത്രരായി വിഹരിക്കുകയാണെന്നും ഇന്ത്യ കുറ്റപ്പെടുത്തി.