അമേരിക്കയിലെ വിമാന ദുരന്തം; പോടോമാക് നദിയില് നിന്ന് 18 മൃതദേഹങ്ങള് കണ്ടെത്തി, രക്ഷാപ്രവര്ത്തനം, വിഡിയോ
വാഷിങ്ടണ്: അമേരിക്കയില് യാത്രാ വിമാനം സൈനിക ഹെലികോപ്റ്ററുമായി കൂട്ടിയിടിച്ചുണ്ടായ അപകടത്തില് 18 മൃതദേഹങ്ങള് കണ്ടെടുത്തു. പോടോമാക് നദിയില് നിന്നാണ് മൃതദേഹങ്ങള് കണ്ടെടുത്തത്. അമേരിക്കന് എയര്ലൈന്സിന്റെ സിആര്ജെ - 700 എന്ന വിമാനമാണ് ലാന്ഡിങ്ങിന് ശ്രമിക്കുന്നതിനിടെ നദിയില് പതിച്ചത്.
വാഷിങ്ടണ് ഡിസിയില് റിഗന് അന്താരാഷ്ട്ര വിമാനത്താവളത്തിന് സമീപം വെച്ചായിരുന്നു അപകടം. അമേരിക്കന് സൈന്യത്തിന്റെ യു.എച്ച് 60 ബ്ലാക്ക് ഹോക്ക് ഹെലിക്കോപ്റ്ററാണ് വിമാനവുമായി കൂട്ടിയിടിച്ചത്. വിമാനത്തില് 65 യാത്രക്കാര് ഉണ്ടായിരുന്നു. പരിശീലന പറക്കല് നടത്തുകയായിരുന്ന സൈനിക ഹെലിക്കോപ്റ്ററില് മൂന്ന് പേരായിരുന്നു ഉണ്ടായിരുന്നത്. ഹെലിക്കോപ്റ്ററും നദിയിലുണ്ടെന്നാണ് വിവരം.
പോടോമാക് നദിയിലും സമീപപ്രദേശങ്ങളിലുമായി വലിയ രീതിയിലുള്ള തിരച്ചിലാണ് നടന്നുകൊണ്ടിരിക്കുന്നത്. വിവിധ സുരക്ഷാ ഏജന്സികളുടെ നേതൃത്വത്തിലാണ് തിരച്ചില് പുരോഗമിക്കുന്നത്. ഞെട്ടിപ്പിക്കുന്ന അപകടമെന്നാണ് അമേരിക്കന് പ്രസിഡന്റ് ഡോണള്ഡ് ട്രംപ് പ്രതികരിച്ചത്. ഇത് നടക്കാന് പാടില്ലായിരുന്നുവെന്ന് പറഞ്ഞ ട്രംപ് വിമാനങ്ങളുടെ പ്രവര്ത്തനങ്ങള് നിയന്ത്രിക്കുന്നതില് കണ്ട്രോള് ടവറുകളുടെ കാര്യക്ഷമതയിലും സംശയം പ്രകടിപ്പിച്ചു
2009 ന് ശേഷം രാജ്യത്തുണ്ടാകുന്ന വലിയ വിമാനാപകടമാണ് ഇത്. നാഷണല് ട്രാന്സ്പോര്ട്ടേഷന് ഏജന്സി അന്വേഷണം ആരംഭിച്ചു കഴിഞ്ഞു. അപകടത്തില് ആരും രക്ഷപ്പെട്ടതായി സൂചനയില്ലെന്ന് വാഷിങ്ടണ് ഡി.സി ഫയര് ചീഫ് പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
