യുവാവിന്റെ കൈയില്‍ നിന്ന് ഫോണ്‍ തട്ടിയെടുത്ത് തത്ത പറന്നു; ക്യാമറയില്‍ പതിഞ്ഞത് മനോഹരമായ ആകാശ ദൃശ്യങ്ങള്‍- വീഡിയോ 

ഡ്രോണ്‍ ഉപയോഗിച്ച് ആകാശ ദൃശ്യങ്ങള്‍ പകര്‍ത്തുന്നത് കണ്ടിട്ടുണ്ട്. എന്നാല്‍ മൊബൈല്‍ ഫോണ്‍ ഉപയോഗിച്ച് ആകാശ ദൃശ്യങ്ങള്‍ പകര്‍ത്തുന്നത് പതിവല്ല. എന്നാല്‍ മൊബൈലില്‍ പകര്‍ത്തിയ മനോഹരമായ ഒരു ആകാശ ദൃശ്യമാണ് ഇപ്പോള്‍ സമൂഹമാധ്യമങ്ങളില്‍ നിറയുന്നത്. ഇത് പകര്‍ത്തിയത് ഒരു തത്തയാണെന്നതാണ് പ്രത്യേകത.

വീടിനു സമീപം നിന്ന് മൊബൈലില്‍ ദൃശ്യം പകര്‍ത്തുകയായിരുന്ന യുവാവ്. ഈസമയത്ത് യുവാവിന്റെ കൈയില്‍ നിന്ന് ഫോണ്‍ തട്ടിയെടുത്ത് തത്ത പറന്നകന്നു. ക്യാമറ ഓണായതിനാല്‍ തത്ത പറക്കുന്നതിനിടയിലുള്ള ദൃശ്യങ്ങളൊക്കെയും അതില്‍ പതിഞ്ഞു. ഒരു മിനിട്ടും 49 സെക്കന്‍ഡുമാണ് തത്ത മൊബൈലുമായി പറന്നത്. സമീപത്തുള്ള വീടുകളുടെയും മറ്റു കെട്ടിടങ്ങളുടെയുമൊക്കെ മനോഹരമായ ആകാശക്കാഴ്ചയാണ് മൊബൈലില്‍ പതിഞ്ഞത്. 

തത്ത പറന്നകന്നതിനു പിന്നാലെ യുവാവും തത്തയുടെ പിന്നാലെ മൊബൈലിനായി ഓടുന്നുണ്ടായിരുന്നു. കുറച്ചുസമയം പറന്ന ശേഷം തത്ത മൊബൈല്‍ ഒരു കാറിന്റെ മുകളില്‍ ഇടുകയായിരുന്നു. തത്തയെ പിന്തുടര്‍ന്ന യുവാവ് ഇത് കണ്ടെത്തുകയും ചെയ്തു. ഫ്രെഡ് സ്‌കള്‍ട്‌സ് എന്ന ട്വിറ്റര്‍ പേജാണ് ദൃശ്യം പങ്കുവച്ചത്.തത്ത പകര്‍ത്തിയ ദൃശ്യം സമൂഹമാധ്യമങ്ങളില്‍ പങ്കുവച്ചതൊടെ ഏറെ ജനശ്രദ്ധ നേടി. ചുരുങ്ങിയ സമയത്തിനുള്ളില്‍ 10 ലക്ഷത്തിലധികം ആളുകളാണ് മനോഹരമായ ദൃശ്യം കണ്ടത്.