പത്തു വയസ്സുകാരനെ ബോട്ടിൽനിന്ന് കടിച്ച് കടലിലേക്കിട്ട് സ്രാവ്; രക്ഷപെടുത്തിയത് പിതാവ്

സിഡ്നി: മീൻ പിടിക്കാൻ പോയ പത്തു വയസ്സുകാരനെ സ്രാവിന്റെ ആക്രമണത്തിൽ നിന്ന് രക്ഷിച്ച് പിതാവ്. കൈയിലും നെഞ്ചിലും തലയിലും മുറിവുണ്ടെങ്കിലും കുട്ടിയുടെ ആരോഗ്യ നില തൃപ്തികരമാണ്.

ഓസ്ട്രേലിയയിലെ ടാസ്മാനിയ ദ്വീപിന്റെ തീരപ്രദേശത്താണ് സംഭവം. തീരത്തുനിന്ന് അഞ്ച് കിലോമീറ്റർ അകലെ സംഘം മീൻപിടിക്കുന്നതിനിടെയായിരുന്നു സ്രാവിന്റെ ആക്രമണം. കുതിച്ചെത്തിയ സ്രാവ് കുട്ടിയെ ബോട്ടിൽനിന്ന് കടിച്ച് കടലിലേക്കു വലിച്ചിടുകയായിരുന്നു. തൊട്ടുപിന്നാലെ കുട്ടിയുടെ പിതാവ് കടലിലേക്കു ചാടി. ഇതോടെ കുട്ടിയെ ഉപേക്ഷിച്ച് സ്രാവ് കടന്നുകളഞ്ഞു.

സുരക്ഷാ വസ്ത്രങ്ങൾ ധരിച്ച് പിതാവിനും മറ്റു രണ്ടു മീൻ പിടിത്തക്കാർക്കുമൊപ്പമായിരുന്നു കുട്ടി കടലിൽ പോയത്.