പാക് ന്യൂസ് ചാനലിൽ ഇന്ത്യൻ പതാകയും സ്വാതന്ത്ര്യദിന ആശംസകളും;  'ഡോൺ ന്യൂസ്' ഹാക്ക് ചെയ്തു; അന്വേഷണം (വീഡിയോ)

ഇസ്ലാമാബാദ്: പാകിസ്ഥാനിലെ പ്രമുഖ വാർത്താ ചാനലായ 'ഡോൺ ന്യൂസ്' ഹാക്ക് ചെയ്തു. സംപ്രേഷണത്തിനിടെ ചാനലിൽ ഇന്ത്യയുടെ ത്രിവർണ പതാകയും സ്വാതന്ത്ര്യ ദിനാശംസകൾ എന്ന സന്ദേശവും പ്രത്യക്ഷപ്പെട്ടു. പരസ്യത്തിനിടെയാണ് ചാനലിൽ ഇന്ത്യൻ പതാകയും ഒപ്പം 'ഹാപ്പി ഇൻഡിപെൻഡൻസ് ഡേ' എന്ന് ഇം​ഗ്ലീഷ് വാചകങ്ങളും സ്ക്രീനിൽ തെളിഞ്ഞത്. 

ഞായറാഴ്ച വൈകീട്ട് പ്രാദേശിക സമയം 3.30 ഓടെയായിരുന്നു സംഭവം. നിരവധി പേരാണ് ഈ ദൃശ്യങ്ങൾ ട്വിറ്ററിൽ പങ്കുവെച്ചിരിക്കുന്നത്. അതേസമയം എത്ര സമയം ഇത് നീണ്ടുനിന്നെന്നോ എങ്ങനെയാണ് ഇത് സംഭവിച്ചതെന്നോ വ്യക്തമല്ല.

ഹാക്കിങ്ങിനിരയായെന്ന വിവരം ഡോൺ ചാനലിന്റെ അധികൃതരും സമ്മതിച്ചിട്ടുണ്ട്. സംഭവത്തിൽ അടിയന്തര അന്വേഷണം നടത്താൻ ചാനൽ മാനേജ്മെന്റ് ഉത്തരവിട്ടതായും ഡോൺ ന്യൂസ് ട്വീറ്റ് ചെയ്തു.