ഇലയനക്കങ്ങള്‍ - ഉണ്ണിക്കൃഷ്ണന്‍ മുതുകുളം എഴുതിയ കവിത

ഇലകള്‍ മിക്കവാറും

നിശ്ചലമാണ്.

ചിലത് ഭൂമിക്കുള്ളില്‍ നിന്നും

ചൂടുകാറ്റു തഴുകുമ്പോള്‍

നിലത്തു തൊട്ടുരുമ്മുന്നു

ചിലത് -

നേരേ മുകളിലേക്കും

താഴേക്കും മാത്രം

മറ്റു ചിലത് -

വശങ്ങളിലേക്ക്...

അപ്പോള്‍ മറ്റുള്ളവ

മൗനം ഭജിക്കുന്നു

പ്രകൃതി നിശ്ചലം

നിരുപദ്രവം എന്ന മട്ടില്‍

കാറ്റ് -

ഏകാകിയാവുന്നു

ചില നേരം ഇലകളെ

കോരിത്തരിപ്പിച്ച്

ആര്‍ത്തുല്ലസിക്കുന്നു

പ്രപഞ്ചതാളം ഇതുതന്നെ

എന്ന മട്ടില്‍

പിന്നെ- കാറ്റ്

നിര്‍ലജ്ജം പിന്മാറുന്നു

ഏറെനേരം പുകയും

മനസ്സില്‍ കനല്‍ കോരിയിട്ട്

തരുക്കളെ നിശ്ചഷ്ടരാക്കി

മരുഭൂവില്‍ മറയുന്നു

വീണ്ടും

ഇലപൊഴിച്ചുകൊണ്ട്

എന്തോ മറന്നിട്ടെന്നപോല്‍

ഉയര്‍ന്നുയര്‍ന്ന്...

ഇലയനക്കങ്ങളായ്...