'താരിഫില്‍ ഇന്ത്യയ്ക്കും ഇളവില്ല, മോദിയോട് പറഞ്ഞിട്ടുണ്ട്'; നികുതിയില്‍ നയം വ്യക്തമാക്കി ട്രംപ്

വാഷിങ്ങ്ടണ്‍: യുഎസിന് ഇറക്കുമതി തീരുവ ചുമത്തുന്ന രാജ്യങ്ങള്‍ക്ക് ട്രംപ് ഭരണകൂടം പരസ്പര നികുതി (റസിപ്രോക്കല്‍ താരിഫ്) ചുമത്താനുള്ള തീരുമാനത്തില്‍ ഇന്ത്യയ്ക്ക് പ്രത്യേക ഇളവില്ലെന്ന് യുഎസ് പ്രസിഡന്റ് ഡോണള്‍ഡ്‌ ട്രംപ്. ഇക്കാര്യം ഇന്ത്യന്‍ പ്രധാനമന്ത്രി നരേന്ദ്രമോദിയെ അറിയിച്ചിട്ടുണ്ടെന്നും ട്രംപ് വ്യക്തമാക്കുന്നു. ഫോക്‌സ് ന്യൂസിന് നല്‍കിയ അഭിമുഖത്തിലാണ് ട്രംപ് ഇക്കാര്യം അറിയിച്ചത്. ഇലോണ്‍ മസ്‌കും ട്രംപും ഒന്നിച്ച് പങ്കെടുത്ത അഭിമുഖം ചൊവ്വാഴ്ച രാത്രിയാണ് ഫോക്‌സ് ന്യൂസ് പുറത്തുവിട്ടത്.

കുടിയേറ്റക്കാരില്ലെങ്കില്‍ മുന്തിരിക്കു വില കൂടും, വൈനിനും! അവിടെയും നില്‍ക്കില്ല കാര്യങ്ങള്‍; നാടുകടത്തല്‍ യുഎസിനെ ബാധിക്കുന്നതെങ്ങനെ

വിദേശ വ്യാപാര പങ്കാളികളായ രാജ്യങ്ങള്‍ ഇറക്കുമതിക്ക് ചുമത്തുന്ന നികുതിയ്ക്ക് സമാനമായ താരിഫ് ഈ രാജ്യങ്ങള്‍ക്കും ചുമത്തുന്ന രീതിയുമായി മുന്നോട്ട് പോകും എന്നാണ് ട്രംപ് വ്യക്തമാക്കിയിരുന്നത്. ചില യുഎസ് ഉല്‍പന്നങ്ങള്‍ക്ക് ഇന്ത്യ കനത്ത തീരുവയാണു ചുമത്തുന്നതെന്നും അതേ മട്ടില്‍ തീരുവ ചുമത്തുകയാണ് തങ്ങള്‍ ഉദ്ദേശിക്കുന്നത് പ്രധാനമന്ത്രി മോദിയെ അറിയിച്ചു എന്നും ട്രംപ് പറയുന്നു.

''കഴിഞ്ഞ ദിവസം മോദി ഇവിടെ ഉണ്ടായിരുന്നു. അദ്ദേഹവുമായി റെസിപ്രോക്കല്‍ താരിഫ് വിഷയം ചര്‍ച്ച ചെയ്തു. ഇന്ത്യ ചില ഉത്പന്നങ്ങള്‍ക്ക് ഉയര്‍ന്ന നികുതി ചുമത്തുന്നു. അത് തിരിച്ചും ചുമത്തും എന്നറിയിച്ചു. എന്നാല്‍ അത് ശരിയല്ലെന്ന് മോദി പറഞ്ഞു. എന്നാല്‍ എല്ലാ രാജ്യങ്ങളോടും അങ്ങനെ ചെയ്യുന്നു, ഇന്ത്യയോടും അതേ നിലപാടാണ് എന്നറിയിച്ചു.'' ട്രംപ് പറയുന്നു.

ഇറക്കുമതി ചെയ്യുന്ന വാഹനങ്ങള്‍ക്ക് ഇന്ത്യ 100 ശതമാനം നികുതി ചുമത്തുന്നു എന്ന വിഷയം ഇലോണ്‍ മസ്‌ക് ഓര്‍മ്മിപ്പിക്കുന്നതും അഭിമുഖത്തിനിടെ കാണാം. വാഹന ഇറക്കുമതിക്ക് 100 ശതമാനം നികുതി ഏര്‍പ്പെടുത്തുന്നു എന്നാണ് മസ്‌കിന്റെ ഓര്‍മ്മപെടുത്തല്‍. താരിഫ് വിഷയത്തില്‍ ആരും തന്നോട് തര്‍ക്കിക്കാന്‍ വരേണ്ടതില്ലെന്നും ട്രംപ് മുന്നറിയിപ്പ് നല്‍കുന്നു. താന്‍ 25 ശതമാനം നികുതി പറഞ്ഞാല്‍ അവര്‍ അധികമെന്ന് പറയുന്നു. ഇനി അങ്ങനെ പറയുന്നില്ല. അവര്‍ എന്ത് ചുമത്തുന്നോ അത് തങ്ങളും ചുമത്തും. ട്രംപ് വ്യക്തമാക്കുന്നു.

ആഡംബര കാറുകള്‍ ഉള്‍പ്പെടെയുള്ള മുപ്പതിലേറെ ഇനങ്ങളുടെ ഇറക്കുമതി തീരുവ യുഎസിന്റെ കടുത്ത സമ്മര്‍ദത്തെ തുടര്‍ന്ന് ഇന്ത്യ പുനഃപരിശോധിക്കാന്‍ ആലോചിക്കുന്നുവെന്ന് നേരത്തെ റിപ്പോര്‍ട്ടുകള്‍ ഉണ്ടായിരുന്നു. ഇതിനിടെ ഇന്ത്യയിലെ നികുതി നിരക്ക് വളരെ ഉയര്‍ന്നതാണ് എന്ന നിലയില്‍ നിരന്തരം ട്രംപ് പ്രസ്താവനയ്ക്ക് മുതിരുകയും ചെയ്തിരുന്നു.

തെരഞ്ഞെടുപ്പുകളില്‍ വോട്ടര്‍മാരുടെ പങ്കാളിത്തം ഉറപ്പുവരുത്തി ഇന്ത്യയിലെ വോട്ടെടുപ്പ് സംവിധാനം ശക്തിപ്പെടുത്താന്‍ അമേരിക്ക ഇന്ത്യയ്ക്ക് നല്‍കിക്കൊണ്ടിരുന്ന സാമ്പത്തിക സഹായം റദ്ദാക്കിയ ഉത്തരവില്‍ ഒപ്പുവച്ചായിരുന്നു ട്രംപ് സമാനമായ പ്രസ്താവന നടത്തിയത്. സാമ്പത്തിക വളര്‍ച്ചയുള്ള, ഉയര്‍ന്ന നികുതി ചുമത്തുന്ന ഇന്ത്യയെപ്പോലെയുള്ള ഒരു രാജ്യത്തിന് അമേരിക്കയുടെ സാമ്പത്തിക സഹായത്തിന്റെ ആവശ്യമില്ലെന്ന് വ്യക്തമാക്കിയാണ് (21 മില്യണ്‍ ഡോളര്‍) 160 കോടി രൂപയോളം വരുന്ന സഹായം അമേരിക്ക നിര്‍ത്തലാക്കിയത്.