വേ​ഗം മണിക്കൂറിൽ 146 കിലോമീറ്റർ! വൈഭവിന്റെ സഹതാരം, ഇന്ത്യയുടെ ഭാവി 'തീപ്പൊരി പേസർ' (വിഡിയോ)

ചെന്നൈ: മണിക്കൂറിൽ 146 കിലോമീറ്റർ വേ​ഗതയിൽ പന്തെറിഞ്ഞ് അമ്പരപ്പിച്ച് ഇന്ത്യൻ കൗമാര താരം ദീപേഷ് ​ദേവേന്ദ്രൻ. തമിഴ്നാട് പ്രീമിയർ ലീ​ഗിൽ മധുര പാന്തേഴ്സിനു വേണ്ടി കളിക്കുന്ന 18കാരൻ ട്രിച്ചി ​ഗ്രാൻഡ് ചോളാസിനെതിരായ പോരാട്ടത്തിലാണ് 146 കിലോമീറ്റർ വേ​ഗതയിൽ പന്തെറിഞ്ഞത്. മത്സരത്തിലുടനീളം 140 കിലോമീറ്റർ വേ​ഗം നിലനിർത്താനും താരത്തിനു സാധിച്ചു.

ഇന്ത്യൻ ക്രിക്കറ്റിൽ വളർന്നു വരുന്ന പ്രതിഭകളുടെ ആഴവും പരപ്പും വ്യക്തമാക്കുന്നതു കൂടിയാണ് ദീപേഷിന്റെ പ്രകടനം. വൈഭവ് സൂര്യവംശി, ആയുഷ് മാത്രെ, ഹെനിൽ പട്ടേൽ, ആർഎസ് അം​ബരീഷ് അടക്കമുള്ള താരങ്ങളെല്ലാം സമീപ കാലത്ത് ഐപിഎൽ അടക്കമുള്ള വിവിധ പോരാട്ടങ്ങളിൽ മിന്നും പ്രകടനമാണ് പുറത്തെടുത്തത്. ആ നിരയിലേക്കേണ് ദീപേഷിന്റെ പ്രകടനവും വരുന്നത്.

അണ്ടർ 19 ലോകകപ്പ് ഇന്ത്യക്ക് സമ്മാനിച്ച പ്രതിഭകളാണ് ഇവരെല്ലാം. ഈ കൂട്ടത്തിൽ തന്നെയാണ് ദീപേഷും. താരവും ഇന്ത്യക്ക് ലോകകപ്പ് സമ്മാനിക്കുന്നതിൽ നിർണായകമായിരുന്നു. വലം കൈയൻ പേസറായ ദീപേഷും ഇന്ത്യൻ സീനിയർ ടീമിനായി കളിക്കുന്നത് സ്വപ്നം കാണുന്നുണ്ട്. അതിനായുള്ള കഠിന പരിശ്രമത്തിലാണ് 18കാരൻ. ദീപേന്ദ്രന്റെ അച്ഛനും മുൻ ക്രിക്കറ്റ് താരമാണ്. അദ്ദേഹവും തമിഴ്നാടിനായി ആഭ്യന്തര ക്രിക്കറ്റ് കളിച്ചിട്ടുണ്ട്.