ഞെട്ടി, ആഴ്സണൽ! വഴങ്ങിയത് 3 ​ഗോളുകൾ; 'ബ്രൈറ്റൻ ബ്രില്ല്യൻസ്'!!!

ലണ്ടൻ: പുതിയ പ്രീമിയർ ലീ​ഗ് സീസണിലെ ആദ്യ തോൽവി അറിഞ്ഞ് ചാംപ്യൻമാരായ ആഴ്സണൽ. എവേ പോരാട്ടത്തിൽ ബ്രൈറ്റൻ ​ഗണ്ണേഴ്സിനെ മറുപടിയില്ലാത്ത മൂന്ന് ​ഗോളുകൾക്ക് തുരത്തി. എല്ലാ ടൂർണമെന്റുകളിലുമായി ആഴ്സണൽ നടത്തിയ 9 ജയങ്ങളുടെ മുന്നേറ്റത്തിനും തിരശ്ശീല വീണു. ഇക്കഴിഞ്ഞ ജനുവരിയിലാണ് ആഴ്സണൽ അവസാനമായി ഒരു ടീമിനെതിരെ മൂന്ന് ​ഗോൾ വഴങ്ങുന്നത്. അതിനു ശേഷം ആദ്യമായാണ് അവർ 3 ​ഗോൾ വഴങ്ങി തോൽക്കുന്നത്.

ആഴ്സണൽ പ്രതിരോധത്തിലെ അപ്രതീക്ഷിത വീഴ്ചകൾ തുറന്നു കാണിച്ച തോൽവിയാണിത്. സമീപകാലത്ത് ​ഗണ്ണേഴ്സ് നടത്തിയ ഏറ്റവും മോശം പ്രകടനവും ആരാധകർ കണ്ടു.

ക്ലബിന്റെ 125ാം വാർഷികം ആഘോഷിക്കുന്ന ബ്രൈറ്റൻ മത്സരത്തിന്റെ ആദ്യ മിനിറ്റ് മുതൽ ആഴ്സണലിനു മേൽ വലിയ സമ്മർദ്ദമുണ്ടാക്കി. പാസ്കൽ ​ഗ്രോസ്, ചരലാമ്പോസ് കൊസ്റ്റൗലാസ് എന്നിവരുടെ ബോക്സിനു പുറത്തു നിന്നുള്ള മനോഹരമായ ഷോട്ടുകളിൽ ​ഗോൾ നേടി ആദ്യ പകുതിയിൽ തന്നെ ബ്രൈറ്റൻ 2-0ത്തിന് മുന്നിലെത്തി. രണ്ടാം പകുതിയുടെ തുടക്കത്തിൽ ചെമ ആൻഡ്രെസ് ഹെഡ്ഡറിലൂടെ മൂന്നാം ​ഗോളും വലയിലാക്കി. കളിയുടെ 31, 45, 57 മിനിറ്റുകളിലാണ് ആഴ്സണൽ വലയിൽ ബ്രൈറ്റൻ പന്ത് നിക്ഷേപിച്ചത്. മൂന്നാം ​ഗോൾ പീരങ്കിപ്പടയുടെ തിരിച്ചു വരവ് സാധ്യത പൂർണമായി അടയ്ക്കുന്നതായിരുന്നു.

ആർട്ടേറ്റയെ തന്ത്രം കൊണ്ട് വീഴ്ത്തി ഹർസലർ

സാധാരണയായി ആഴ്സണൽ പുറത്തെടുക്കുന്ന ശാരീരിക മേധാവിത്വവും പ്രസ്സിങ് ശൈലിയും തിരിച്ച് പ്രയോ​ഗിച്ചാണ് ബ്രൈറ്റന്റെ 33കാരനായ പരിശീലകൻ ഫാബിയൻ ഹർസലർ ചാംപ്യൻമാരെ വീഴ്ത്താൻ തന്ത്രമൊരുക്കിയത്. ഡി​ഗോ ​ഗോമസ്, മാക്സിം ഡി ക്യുപ്പർ എന്നിവരുടെ കരുത്തുറ്റ പ്രസ്സിങ് കളിക്ക് വേ​ഗം കൂട്ടി. മിഡ്ഫീൽഡിൽ യാസിൻ അയാരിയും പാസ്കൽ ​ഗ്രോസും തളർച്ചയില്ലാതെ ഓടിക്കളിച്ചപ്പോൾ പ്രതിരോധത്തിൽ ലൂക്കാ വുസ്കോവിച് ആക്രമണങ്ങളെ സമർഥമായി തന്നെ നേരിട്ടു.

പ്രതിരോധ വീഴ്ച

ഈ കളിക്ക് മുൻപ് ആഴ്സണൽ ഒറ്റ ​ഗോൾ മാത്രമായിരുന്നു വഴങ്ങിയത്. അതിനാൽ തന്നെ ബ്രൈറ്റനെതിരെ അവരുടെ ഡിഫൻസ് അമ്പേ പാളിയെന്നു പറഞ്ഞാൽ തെറ്റില്ല. ആദ്യ രണ്ട് ​ഗോളുകളും ബ്രൈറ്റൻ ബോക്സിനു പുറത്തു നിന്നാണ് നേടിയതെങ്കിലും എതിർ ടീം കളിക്കാർക്ക് കൃത്യമായി ഇടം കൊടുക്കുകയും പന്ത് തടയുന്നതിൽ പരാജയപ്പെടുകയും ചെയ്തത് ​ഗണ്ണേഴ്സ് പ്രതിരോധത്തിന്റെ വീഴ്ചയായിരുന്നു.

ആദ്യ ​ഗോളിൽ റിക്കാർഡോ കലാഫിയോരിയുടേയും ​ഗബ്രിയേലിന്റേയും പിഴവുകളാണ് കാരണമായത്. രണ്ടാം ​ഗോളിൽ ​ഗബ്രിയേലിനും എസ്രി കോൻസയ്ക്കും വേ​ഗത്തിൽ പ്രതികരിക്കാൻ സാധിക്കാതെ പോയി. മത്സരത്തിൽ ഭൂരിഭാ​ഗം സമയത്തും ബാക്ക് ഫൂട്ടിലായിരുന്നു ആഴ്സണൽ. മാർക്കിങിലെ പിഴവുകളും സമ്മർദ്ദ ഘട്ടങ്ങളിൽ പന്ത് മുന്നോട്ട് എത്തിക്കാൻ സാധിക്കാത്തതും അവരെ കുടുക്കി.