ഒന്നാം ദിനം വീണത് 20 വിക്കറ്റുകള്‍! 123 വര്‍ഷങ്ങള്‍ക്ക് ശേഷം ആഷസിൽ വീണ്ടും അത് സംഭവിച്ചു

മെല്‍ബണ്‍: ആഷസ് പരമ്പരയിലെ നാലാം ടെസ്റ്റിന്റെ ആദ്യ ദിനത്തില്‍ വീണത് 20 വിക്കറ്റുകള്‍. ബോക്‌സിങ് ഡേ ടെസ്റ്റിന്റെ ആദ്യ ദിനത്തില്‍ തന്നെ ഓസ്‌ട്രേലിയ, ഇംഗ്ലണ്ട് ടീമുകളുടെ ഒന്നാം ഇന്നിങ്‌സും അവസാനിച്ചു.

ആഷസ് പോരാട്ടത്തിന്റെ ചരിത്രത്തില്‍ 123 വര്‍ഷങ്ങള്‍ക്കു ശേഷമാണ് ഇത്തരമൊരു വിക്കറ്റ് വീഴ്ച. 1902ലെ ആഷസ് പരമ്പരയിലാണ് നേരത്തെ ഒന്നാം ദിനത്തിൽ തന്നെ രണ്ട് ടീമിലേയും പത്ത് താരങ്ങള്‍ പുറത്താകുന്നത്.

ടോസ് നേടി ഇംഗ്ലണ്ട് ബൗളിങെടുക്കുകയായിരുന്നു. ആദ്യം ബാറ്റ് ചെയ്ത ഓസ്‌ട്രേലിയയെ 152 റണ്‍സില്‍ പുറത്താക്കാന്‍ ഇംഗ്ലണ്ടിനു സാധിച്ചു. എന്നാല്‍ ഇംഗ്ലീഷ് ബാറ്റിങ് അതിലും ദയനീയമായിരുന്നു. അവരുടെ പോരാട്ടം വെറും 110 റണ്‍സില്‍ അവസാനിപ്പിച്ചാണ് ഓസീസ് തിരിച്ചടിച്ചത്. ഒറ്റ ദിവസം വീണത് 20 വിക്കറ്റുകള്‍.

മെല്‍ബണില്‍ റെക്കോര്‍ഡ് കാണികളാണ് കളി കാണാനത്തെയിത്. 94,199 ആരാധകരാണ് മത്സരം നേരില്‍ കാണാനായി എത്തിയത്. ആരാധകര്‍ക്ക് ബാറ്റിങ് വിരുന്ന് കിട്ടിയില്ലെങ്കിലും ഇരു ടീമിലേയും പേസര്‍മാര്‍ കളം അടക്കി വാഴുന്ന കാഴ്ചയായിരുന്നു മെല്‍ബണില്‍.