ഡ​ഗൗട്ടിലെ ഫോൺ ഉപയോഗം; റോമി ബിന്ദർക്ക് കുരുക്ക് മുറുകുന്നു,വിശദീകരണം തേടി ബിസിസിഐ

ഗുവാഹത്തി: ഐപിഎൽ മത്സരത്തിനിടെ ഡ​ഗൗട്ടിൽ വെച്ച് ഫോൺ ഉപയോഗിച്ച സംഭവത്തിൽ രാജസ്ഥാൻ ടീം മാനേജർ റോമി ബിന്ദർക്ക് നോട്ടിസ് നൽകി. ബിസിസിഐയുടെ ആന്റി-കറപ്ഷൻ യൂണിറ്റ് (ACU) ആണ് സംഭവത്തിൽ വിശദീകരണം നൽകാൻ നോട്ടിസിലൂടെ ആവശ്യപ്പെട്ടിരിക്കുന്നത്. ഇതിനായി 48 മണിക്കൂർ സമയവും അനുവദിച്ചിട്ടുണ്ട്.

സംഭവത്തിൽ ബിസിസിഐയുടെ ആന്റി-കറപ്ഷൻ യൂണിറ്റ് (ACU) നേരത്തെ അന്വേഷണം ആരംഭിച്ചിരുന്നു. റോമി ബിന്ദറിന്റെ വിശദീകരണം കൂടി പരിശോധിച്ച ശേഷം അന്തിമ റിപ്പോർട്ട് എസിയു മേധാവിക്ക് സമർപ്പിക്കും. അതിന്റെ അടിസ്ഥാനത്തിലാകും അന്തിമ നടപടിയെന്നും ബിസിസിഐ അധികൃതർ വ്യക്തമാക്കി.

റോയൽ ചലഞ്ചേഴ്‌സ് ബംഗളുരുവിന് എതിരായ മത്സരത്തിനിടെ ഡ​ഗൗട്ടിൽ വെച്ച് റോമി ബിന്ദർ ഫോൺ ഉപയോഗിക്കുന്നതിന്റെ ദൃശ്യങ്ങൾ നേരത്തെ പുറത്ത് വന്നിരുന്നു.

മത്സരത്തിന്റെ 11-ാം ഓവറിനിടെയാണ് സംഭവം നടന്നത്. രാജസ്ഥാൻ യുവതാരം വൈഭവ് സൂര്യവംശിയോടൊപ്പം ഡ​ഗൗട്ടിൽ ഇരിക്കുക ആയിരുന്നു ടീം മാനേജർ റോമി ബിന്ദർ. ഈ സമയത്താണ് പോക്കറ്റിൽ നിന്ന് ഫോൺ എടുത്ത് റോമി ബിന്ദർ ഉപയോഗിച്ചത്. ഈ സമയത്ത് സൂര്യവംശി ഫോണിലേക്ക് നോക്കുന്നതും ദൃശ്യങ്ങളിൽ കാണാം.