ബി​ഗ് ബാഷിലേക്ക് ഐപിഎൽ ഫ്രാഞ്ചൈസികളും? ക്രിക്കറ്റ് ഓസ്ട്രേലിയയുടെ ചരിത്ര പ്രഖ്യാപനം!

സിഡ്നി: ഓസ്ട്രേലിയൻ ഫ്രൈഞ്ചൈസി ക്രിക്കറ്റ് ടൂർണമെന്റായ ബി​ഗ് ബാഷ് ലീ​ഗിൽ സമൂലമായ മാറ്റങ്ങൾക്ക് വഴിയൊരുക്കി ചരിത്ര പ്രഖ്യാപനവുമായി ക്രിക്കറ്റ് ഓസ്ട്രേലിയ. ചരിത്രത്തിലാദ്യമായി ബി​ഗ് ബാഷ് ടീമുകളിൽ സ്വകാര്യ നിക്ഷേപത്തിനു അനുവാദം നൽകി ക്രിക്കറ്റ് ഓസ്ട്രേലിയ. 2027-28 സീസൺ മുതൽ ടീമുകളിൽ സ്വകാര്യ നിക്ഷേപം നടത്താനാണ് അനുമതി നൽകിയത്. ക്രിക്കറ്റ് ഓസ്ട്രേലിയയും സ്റ്റേറ്റ് ക്രിക്കറ്റ് അസോസിയേഷനുകളും തമ്മിൽ മാസങ്ങളോളം നീണ്ട ചർച്ചകൾക്കൊടുവിലാണ് തീരുമാനം. ഐപിഎൽ ഫ്രാഞ്ചൈസി ഉടമകളടക്കം ഭാവിയിൽ ബി​ഗാ ബാഷിലും നിക്ഷേപം ഇറക്കുമെന്നു ഏതാണ്ട് ഉറപ്പാണ്.

ഇതിന്റെ ആദ്യപടിയായി മെൽബൺ റെന​ഗേറ്റ്സ് ടീം സ്വകാര്യ നിക്ഷേപത്തിനു കളമൊരുക്കുകയും ചെയ്തിട്ടുണ്ട്. സ്വകാര്യ ഉടമസ്ഥാവകാശ പ്രക്രിയയിലേക്ക് പ്രവേശിക്കുന്ന ആദ്യ ബിബിഎൽ ഫ്രാഞ്ചൈസിയായി ഇതോടെ റെന​ഗേറ്റ്സ് മാറുകയും ചെയ്തു. ബി​ഗ് ബാഷ് ലീ​ഗിലെ കളിക്കാരും ടീമുകളും ലോകമെമ്പാടുമുള്ള ആവേശകരമായ ലീ​ഗുകളിലേക്ക് ആകർഷിക്കപ്പെടുന്ന സാഹചര്യത്തിലാണ് നിർണായക നീക്കം. മാത്രമല്ല ടി20 മത്സരത്തിലേക്ക് സ്വകാര്യ നിക്ഷേപം കൊണ്ടുവന്ന് ഓസ്ട്രേലിയൻ ക്രിക്കറ്റിന്റെ സാമ്പത്തിക സ്ഥിതി ശക്തിപ്പെടുത്തുകയും ഈ നീക്കത്തിലൂടെ ലക്ഷ്യമിടുന്നു.

റെന​ഗേറ്റ്സിന്റെ ചുവടുപിടിച്ച് ഹൊബാർട്ട് ഹരിക്കെയ്ൻസ്, പെർത്ത് സ്കോർച്ചേഴ്സ്, മെൽബൺ സ്റ്റാർസ് അടക്കമുള്ള ടീമുകൾ സ്വകാര്യ നിക്ഷേപത്തിൽ താത്പര്യം പ്രകടിപ്പിച്ചിട്ടുണ്ട്. ക്രിക്കറ്റ് വിക്ടോറിയയുടെ ഉടമസ്ഥതയിലുള്ളതാണ് റെന​ഗേറ്റ്സ്. 2018-19 സീസണിൽ ബി​ഗ് ബാഷ് കിരീടം നേടിയ ടീമാണ് റെന​ഗേറ്റ്സ്.

സ്വകാര്യ നിക്ഷേപവും ഉടമസ്ഥാവകാശവും അനുവദിക്കുന്നുണ്ടെങ്കിലും മത്സരത്തിന്റെ പ്രധാന മേഖലകളിലെ നിയന്ത്രണം തുടർന്നും ക്രിക്കറ്റ് ഓസ്ട്രേലിയക്ക് തന്നെയായിരിക്കും. അന്താരാഷ്ട്ര ഷെഡ്യൂളിങ്, കളിക്കാരുടെ ലഭ്യത, ശമ്പള പരിധി നിശ്ചയിക്കൽ, മാധ്യമ അവകാശങ്ങൾ എന്നിവയുടെ നിയന്ത്രണം ഭരണസമിതിയുടെ കൈകളിൽ തന്നെയായിരിക്കും. നിക്ഷേപകരെ അം​ഗീകരിക്കൽ, ഒഴിവാക്കൽ, വിൽപ്പനയ്ക്കുള്ള റിസർവ് വില നിശ്ചയിക്കൽ തുടങ്ങിയ അധികാരങ്ങളും ക്രിക്കറ്റ് ഓസ്ട്രേലിയ തന്നെ നിർവഹിക്കും.