ബ്ലാസ്റ്റേഴ്സിന്റെ ഹോം മാച്ച് കൊച്ചിയിൽ തന്നെ; ജിസിഡിഎയുമായുള്ള വാടക തർക്കം പരിഹരിച്ചു

കൊച്ചി : കേരള ബ്ലാസ്റ്റേഴ്സിന്റെ ഹോം മത്സരങ്ങൾ കൊച്ചിയിൽ തന്നെ നടക്കും. കലൂർ ജവഹർ ലാൽ നെഹ്റു സ്റ്റേഡിയത്തിലെ വാടകയുമായി ബന്ധപ്പെട്ട പ്രശ്നങ്ങൾ പരിഹരിച്ചു. കഴിഞ്ഞ വർഷത്തെ വാടകത്തുക തന്നെ തുടരാൻ ബ്ലാസ്റ്റേഴ്‌സ് മാനേജ്‌മെന്റും ജിസിഡിഎയും തമ്മിൽ ധാരണയായി.

ഇതോടെ മറ്റന്നാളത്തെ ബ്ലാസ്റ്റേഴ്സിന്റെ ഹോം മാച്ച് കൊച്ചി നെഹ്റു സ്റ്റേഡിയത്തിൽ തന്നെ നടക്കും. ഒരു മത്സരത്തിന് 3.5 ലക്ഷം വാടക തുടരും. ഇളവ് അനുവദിച്ചു സർക്കാർ ഉത്തരവ് നാളെ ഇറങ്ങും. 8-9 ലക്ഷം രൂപയാണ് ജിസിഡിഎ വാടകായി ആവശ്യപ്പെട്ടിരുന്നത്.

പ്രതിസന്ധി ഒഴിഞ്ഞതോടെ ടിക്കറ്റ് വിൽപന ഉടൻ തുടങ്ങും. ബ്ലാസ്റ്റേഴ്‌സ് ഇളവ് തേടി തദ്ദേശ വകുപ്പിനെ സമീപിച്ചിരുന്നു. തുടർന്ന് തദ്ദേശ വകുപ്പ് ജിസിഡിഎ സെക്രട്ടറിയോട് റിപ്പോർട്ട്‌ തേടി. സർക്കാർ ഉത്തരവ് ഉണ്ടെങ്കിൽ ഇളവ് നൽകാമെന്ന് ജിസിഡിഎ മറുപടി നൽകിയിരുന്നു.