'ഭീഷണികൾ വരുന്നു, ഇനി എന്നെ ക്രൂശിക്കരുത്; ആരുടേയും ബന്ധം ഞാൻ തകർത്തിട്ടില്ല'

മുംബൈ: ഇന്ത്യൻ വനിതാ ക്രിക്കറ്റ് ടീം വൈസ് ക്യാപ്റ്റൻ സ്മൃതി മന്ധാനയും സം​ഗീത സംവിധായകൻ പലാഷ് മുച്ഛലും തമ്മിലുള്ള വിവാ​ഹം മുടങ്ങിയത് വലിയ ചർച്ചയായിരുന്നു. നവംബർ 23നു നടക്കേണ്ടിയിരുന്ന വിവാഹം അപ്രതീക്ഷിത സംഭവങ്ങളെ തുടർന്നു മാറ്റിവച്ചിരുന്നു. പിന്നീട് ഇതു സംബന്ധിച്ച് പല അഭ്യൂഹങ്ങളും പ്രചരിച്ചിരുന്നു. സ്മൃതിയുടെ പിതാവും പിന്നാലെ പലാഷും ആശുപത്രിയിലായതാണ് വിവാഹം മാറ്റി വയ്ക്കാൻ കാരണമായി ആദ്യം കേട്ടത്.

പിന്നീട് പലാഷിന്റേതെന്ന പേരിൽ ചില ചാറ്റുകളുടെ സ്ക്രീൻ ഷോട്ടുകളും സമൂഹ മാധ്യമങ്ങളിൽ പ്രചരിച്ചിരുന്നു. ഇതും വിവാഹം മാറ്റി വയ്ക്കാൻ കാരണമായെന്നാണ് ആരോപണം വന്നത്. കൊറിയോ​ഗ്രാഫർമാരായ മേരി ഡി കോസ്റ്റ്, നന്ദിക ദ്വിവേദി, ​ഗുൽനാസ് ഖാൻ എന്നിവരുമായി ചേർത്തും ആരോപണങ്ങൾ ഉയർന്നു. ഇവരുമായുള്ള പലാഷിന്റെ അടുപ്പമാണ് വിവാഹം മുടങ്ങാൻ കാരണമായതെന്നും ആരോപിക്കപ്പെട്ടു.

പലാഷുമായി ചാറ്റ് ചെയ്തിട്ടുണ്ടെന്നു മേരി ഡി കോസ്റ്റ് കഴിഞ്ഞ ദിവസം സമ്മതിച്ചിരുന്നു. ഇപ്പോൾ നന്ദികയും ​ഗുൽനാസ് ഖാനും വിഷയത്തിൽ പ്രതികരിച്ച് രം​ഗത്തെത്തി. പലാഷ്, സ്മൃതി ബന്ധത്തിൽ താൻ ഇടപെട്ടിട്ടില്ലെന്നും ആരോപണങ്ങൾ അടിസ്ഥാനരഹിതമാണെന്നും ഇൻസ്റ്റ​ഗ്രാം സ്റ്റോറിയിലെ നീണ്ട കുറിപ്പിൽ നന്ദിക പറഞ്ഞു. പലാഷിന്റേയോ സ്മൃതിയുടേയോ പേരുകൾ കുറിപ്പിൽ പരാമർശിക്കുന്നില്ല.

'കഴിഞ്ഞ കുറച്ചു ദിവസങ്ങളായി മറ്റു ചിലരുടെ വ്യക്തിപരമായ കാര്യങ്ങളിൽ എന്റെ പങ്കാളിത്തമുണ്ടെന്ന തരത്തിൽ ചില അഭ്യൂഹങ്ങൾ പ്രചരിക്കുന്നത് ഞാൻ കണ്ടു. എന്നെക്കുറിച്ച് ഉന്നയിക്കപ്പെടുന്ന ആരോപണങ്ങൾ പ്രത്യേകിച്ച് ആരുടെയെങ്കിലും ബന്ധം തകർക്കുന്നതിൽ ഞാൻ ഒരു പങ്കുവഹിച്ചെന്നത് സത്യമല്ലെന്നു വ്യക്തമാക്കാൻ ആ​ഗ്രഹിക്കുന്നു. എനിക്ക് പങ്കില്ലാത്ത ഒരു കാര്യത്തെ കുറിച്ചുള്ള ഈ ചർച്ചകൾ കാണുന്നത് വളരെ വേദനിപ്പിക്കുന്നു. യാഥാർഥ്യമല്ലാത്ത ഈ കഥകൾ ഇത്ര വേ​ഗം പ്രചരിക്കുന്നത് കാണാൻ അതിലും ബുദ്ധിമുട്ടാണ്.'

​ഗോസിപ്പുകളെ അടിസ്ഥാനമാക്കി വിവരങ്ങൾ പ്രസിദ്ധീകരിക്കുന്ന മാധ്യമങ്ങളേയും അവർ വിമർശിച്ചു.

'ഇനി എന്നെ ക്രൂശിക്കരുത്. ഇതിൽ നിന്നു പുറത്തു വരുന്നത് എന്നെ സംബന്ധിച്ചു എളുപ്പമായിരിക്കില്ല. അസത്യമായ കാര്യങ്ങൾ കാരണം ഞാൻ സ്നേഹിക്കുന്നവർ സമ്മർദ്ദത്തിലാകുകയും വേദനിക്കുകയും ചെയ്യുന്നത് ഞാൻ കണ്ടുകൊണ്ടിരിക്കുകയാണ്. അതെന്റെ മാനസിക ആരോ​ഗ്യത്തേയും ബാധിക്കുന്നു. കുടുംബാം​ഗങ്ങൾ കാണുന്ന തരത്തിൽ എനിക്കു ഭീഷണികൾ ലഭിക്കുന്നു. അതുകൊണ്ടാണ് എന്റെ അക്കൗണ്ട് ഇപ്പോൾ സ്വകാര്യമാക്കിയത്.

'ദയവായി കിംവദന്തികൾ നിർത്താൻ ഞാൻ എല്ലാവരോടും അഭ്യർഥിക്കുന്നു. മുംബൈയിലേക്ക് വരാനും ജോലി ചെയ്യാനും എന്റെ ലക്ഷ്യങ്ങൾ നേടാനും ഞാൻ ഒരുപാട് ത്യാ​ഗങ്ങൾ സഹിച്ചിട്ടുണ്ട്. ദയവായി എന്റെ പേര് ഇതിനപ്പുറം കൊണ്ടുപോകരുത്. എനിക്ക് ഇക്കാര്യങ്ങളിലൊന്നും ബന്ധമില്ല. ഒടുവിൽ സത്യം അതിന്റെ വഴി കണ്ടെത്തും'- നന്ദിക വൈകാരികമായി കുറിച്ചു.

സ്മൃതി- പലാഷ് വിവാ​ഹം മുടങ്ങിയതിൽ തനിക്കും പങ്കില്ലെന്നു വ്യക്തമാക്കി ​ഗുൽനാസും രം​ഗത്തെത്തി.

'എന്നെയും എന്റെ സുഹൃത്ത് നന്ദികയേയും കുറിച്ച് ധാരാളം ഊഹാപോഹങ്ങളും തെറ്റായ അവകാശവാദങ്ങളും പ്രചരിക്കുന്നത് എന്റെ ശ്രദ്ധയിൽപ്പെട്ടു. ഈ വിഷയത്തിൽ ഉൾപ്പെട്ട വ്യക്തി ഞങ്ങളല്ല. ഒരാളെ നമുക്ക് അറിയാം എന്നതോ അവരോടൊപ്പം ഒരു ഫോട്ടോ ഉണ്ട് എന്നതോ അവരുമായി വ്യക്തിപരമായ ബന്ധമുണ്ടെന്നു അർഥമാക്കുന്നില്ല. ദയവായി കാര്യങ്ങൾ മാന്യമായി കൈകാര്യം ചെയ്യണം. തിടുക്കത്തിൽ നി​ഗമനങ്ങളിൽ എത്തരുത്'- ​ഗുൽനാസ് ഇൻസ്റ്റ​ഗ്രാം പോസ്റ്റിൽ വ്യക്തമാക്കി.