വിനേഷ് ഫോ​ഗട്ടിന് വൻ തിരിച്ചടി; ലോക ചാംപ്യൻഷിപ്പ് സെലക്ഷൻ ട്രയൽസിൽ പങ്കെടുപ്പിക്കണം; ഹർജി ​ഹൈക്കോടതി തള്ളി

ന്യൂഡൽഹി: ലോക ചാംപ്യൻഷിപ്പിനായുള്ള സെലക്ഷൻ ട്രയൽസിൽ പങ്കെടുക്കാൻ അനുവദിക്കണമെന്ന ​ഗുസ്തി താരവും കോൺ​ഗ്രസ് എംഎൽഎയുമായ വിനേഷ് ഫോ​ഗട്ടിന്റെ ഹർജി ഡൽഹി ഹൈക്കോടതി തള്ളി. ട്രയൽസിൽ പങ്കെടുക്കാൻ അനുമതി നിഷേധിച്ച ​ഗുസ്തി ഫെഡറേഷൻ ഓഫ് ഇന്ത്യയുടെ (ഡബ്ല്യുഎഫ്ഐ) നയപരമായ മാനദണ്ഡങ്ങൾ ചോദ്യം ചെയ്താണ് വിനേഷ് കോടതിയെ സമീപിച്ചത്. എന്നാൽ ഹർജി ഹൈക്കോടതി നിരസിച്ചു. ഈ മാസം 14ന് ഡൽഹിയിലെ ഇന്ദിരാ​ഗാന്ധി സ്റ്റേഡിയത്തിലാണ് ട്രയൽസ് നടക്കുന്നത്.

ഈ മാസം ഏഴിന് ഡബ്ല്യുഎഫ്ഐ പുറപ്പെടുവിച്ച സർക്കുലറിലെ യോ​ഗ്യതാ മാനദണ്ഡങ്ങളാണ് വിനേഷ് ഫോ​ഗട്ട് ചോദ്യം ചെയ്തത്. 2025, 2026 വർഷങ്ങളിലെ മെഡൽ ജേതാക്കൾ, ദേശീയ പരിശീലന ക്യാംപിൽ പങ്കെടുക്കുന്നവർ, 2026ലെ അണ്ടർ 20 ലോക ​ഗുസ്തി ചാംപ്യൻഷിപ്പിലേക്ക് യോ​ഗ്യത നേടിയവർ എന്നിവർക്ക് മാത്രമാണ് ട്രയൽസിൽ പങ്കെടുക്കാൻ യോ​ഗ്യത നൽകിയത്. പ്രസവ അവധിയിലായിരുന്ന വിനേഷിന് ഈ മാനദണ്ഡങ്ങൾ കാരണം മത്സരങ്ങളിൽ പങ്കെടുക്കാൻ കഴിഞ്ഞിരുന്നില്ല.

ഈ മാസം ഏഴിനു മാത്രമാണ് പുതിയ മാനദണ്ഡങ്ങളെ കുറിച്ച് അറിവ് കിട്ടിയത് എന്നാണ് വിനേഷിനായി ഹാജരായ അഭിഭാഷകൻ വാദിച്ചത്. ​ഗർഭധാരണം, പ്രസവം, അതിനു ശേഷമുള്ള ആരോ​ഗ്യം വീണ്ടെടുക്കൽ കാലയളവ് എന്നിവ കാരണം അവർക്ക് മത്സരങ്ങളിൽ പങ്കെടുക്കാൻ സാധിച്ചില്ലെന്നും പുതിയ മാനദണ്ഡങ്ങൾ അവരെ പൂർണമായി ഒഴിവാക്കുന്നതാണെന്നും അഭിഭാഷകൻ വാദിച്ചു. ഫലത്തിൽ അവർക്ക് കരിയറിൽ ഇനി രണ്ട് വർഷം നഷ്ടമാകുമെന്നും ​കായിക താരം എന്ന നിലയിലുള്ള കരിയർ തന്നെ അവസാനിപ്പിക്കേണ്ടി വരുമെന്നും അഭിഭാഷകൻ ചൂണ്ടിക്കാട്ടി.

എന്നാൽ ഡബ്ല്യുഎഫ്ഐ നിശ്ചയിച്ച യോ​ഗ്യത മാനദണ്ഡങ്ങളിൽ നിന്നു വിനേഷ് ഫോ​ഗട്ടിനു മാത്രം ഇളവ് നൽകാൻ കഴിയില്ലെന്നു കോടതി വ്യക്തമാക്കി. സർക്കുലർ എല്ലാ കായിക താരങ്ങൾക്കും ഒരുപോലെ ബാധകമാണ്. എന്ത് കാരണം കൊണ്ടായാലും നിർദ്ദിഷ്ട മത്സരങ്ങളിൽ പങ്കെടുക്കാത്ത ഒരു കായിക താരത്തിനു യോ​ഗ്യത വിഭാ​ഗത്തിൽ ഉൾപ്പെടാൻ സാധിക്കില്ല. നയത്തിന്റെ സാധുത പരിശോധിക്കുന്നതിനു മുൻപ് വിനേഷ് ഫോ​ഗട്ടിനു മാത്രം ഇളവ് നൽകുന്നത് സമാന സാഹചര്യത്തിലൂടെ കടന്നു പോകുകയും എന്നാൽ കോടതിയെ സമീപിക്കാതിരിക്കുകയും ചെയ്ത മറ്റ് കായിക താരങ്ങളോടു കാണിക്കുന്ന നീതികേടായിരിക്കുമെന്നും കോടതി നിരീക്ഷിച്ചു.

അതേസമയം പ്രസവാവധി കഴിഞ്ഞ് തിരിച്ചെത്തുന്ന വനിതാ കായിക താരങ്ങൾക്കായി പ്രത്യേക മാർ​ഗ നിർദ്ദേശങ്ങൾ രൂപീകരിക്കുന്നത് പരി​ഗണിക്കണമെന്നു കോടതി ഡബ്ല്യുഎഫ്ഐയ്ക്ക് നിർദ്ദേശം നൽകി. രാജ്യത്തിന്റെ താത്പര്യവും കായിക താരങ്ങളുടെ ക്ഷേമവും ഒരുപോലെ സംരക്ഷിക്കപ്പെടുന്ന രീതിയിലായിരിക്കണം ഇത്തരം നയങ്ങൾ രൂപീകരിക്കേണ്ടതെന്നും കോടതി വ്യക്തമാക്കി.