മറഡോണയുടെ 'ദൈവത്തിന്റെ കൈ' ​ഗോൾ പിറന്ന വിഖ്യാത പന്ത് ലേലം ചെയ്യുന്നു!

ന്യൂയോർക്ക്: 1986ലെ ലോകകപ്പിൽ ഇം​ഗ്ലണ്ടിനെതിരായ ക്വാർട്ടർ പോരാട്ടത്തിൽ അർജന്റീനയുടെ ഇതിഹാസ നായകൻ ഡീ​ഗോ മറ‍ഡോണ നേടിയ കുപ്രസിദ്ധിയാർജിച്ച 'ദൈവത്തിന്റെ കൈ' ​എന്നു പിൽക്കാലത്ത് അറിയപ്പെട്ട ഗോൾ നേടിയ പന്ത് ലേലത്തിന് വയ്ക്കുന്നു. ഈ മാസം യുഎസിൽ നടക്കുന്ന ലേലത്തിൽ 10 ദശലക്ഷം യുഎസ് ഡോളർ (ഏതാണ്ട് 83 കോടി രൂപ) ആണ് പന്തിന് പ്രതീക്ഷിക്കുന്ന വില. ടെക്സസ് ആസ്ഥാനമായി പ്രവർത്തിക്കുന്ന ഹെറിറ്റേജ് ഓക്ഷൻസ് ഓ​ഗസ്റ്റ് 21 മുതൽ 23 വരെ നടത്തുന്ന ലേലത്തിൽ 2.5 ദശലക്ഷം യുഎസ് ഡോളർ (ഏതാണ്ട് 24 കോടി രൂപ) ആണ് ആരംഭ തുകയായി നിശ്ചയിച്ചിരിക്കുന്നത്.

മെക്സിക്കോയിലെ എസ്റ്റാഡിയോ അസ്റ്റെക്ക സ്റ്റേഡിയത്തിൽ നടന്ന ക്വാർട്ടർ ഫൈനൽ മത്സരത്തിലാണ് മറഡോണയുടെ കുപ്രസിദ്ധി നേടിയ ​ഗോളിന്റെ പിറവി. ഇം​ഗ്ലണ്ട് ​ഗോൾ കീപ്പറെ മറികടന്ന് ബോക്സിൽ നിന്നു മറഡോണ പന്ത് കൈകൊണ്ടു തട്ടിയിടുകയായിരുന്നു. ഇം​ഗ്ലണ്ട് താരങ്ങൾ ഹാൻഡ് ബോളാണെന്നു വാദിച്ചെങ്കിലും റഫറി ​ഗോൾ അനുവദിച്ചത് അന്ന് വിവാദ​മായി. ഇതേ മത്സരത്തിൽ തന്നെ മറഡോണ ഇം​ഗ്ലീഷ് താരങ്ങളെ ഒന്നൊന്നായി വെട്ടിച്ച് നേടിയ സോളോ ​ഗോൾ നൂറ്റാണ്ടിന്റെ ​ഗോളായും ഫിഫ തിരഞ്ഞെടുത്തിരുന്നു. മത്സരത്തിൽ അർജന്റീന ഈ രണ്ട് ​ഗോളുകളുടെ ബലത്തിൽ 2-1നു ജയിച്ച് സെമിയിലേക്കും മുന്നേറി.

മത്സര ശേഷം ഈ ​ഗോളിനെക്കുറിച്ച് ചോദിച്ചപ്പോൾ മറഡോണ പറഞ്ഞ വാചകമാണ് പിൽക്കാലത്ത് ദൈവത്തിന്റെ കൈ എന്ന വിശേഷണം വിവാദ ​ഗോളിനു ചാർത്തിക്കിട്ടിയത്. 'അൽപ്പം മറഡോണയുടെ തലയും ബാക്കി ദൈവത്തിന്റെ കൈയും'- എന്നാണ് മറഡോണയുടെ ​ഗോളിനെക്കുറിച്ചുള്ള പ്രതികരണം.

ഫുട്ബോൾ ചരിത്രത്തിലെ തന്നെ ഏറ്റവും ചരിത്രപരമായ പ്രാധാന്യമുള്ള പന്താണിതെന്നു ഹെറിറ്റേജ് ഓക്ഷൻസ് സ്പോർട്സ് വിഭാ​ഗം വൈസ് പ്രസിഡ‍ന്റ് ഡാൻ ഇംലർ പറയന്നു. ഇതേ മത്സരത്തിൽ തന്നെ നൂറ്റാണ്ടിന്റെ ​ഗോൾ എന്നറിയപ്പെട്ട വിഖ്യാത ​ഗോൾ നേടിയതും സമാന പന്താണെന്നും അദ്ദേഹം എടുത്തു പറഞ്ഞു. രണ്ട് ​ഗോളുകളും ഐക്കണിക്കും അത്രമേൽ ഓർമിക്കപ്പെടുന്നതുമാണെന്നും ഇംലർ കൂട്ടിച്ചേർത്തു.

ഈ മത്സരത്തിൽ മറഡോണ ധരിച്ച ജേഴ്സിയും നേരത്തെ ലേലലത്തിൽ വിറ്റ് പോയിരുന്നു. ഫുട്ബോൾ ചരിത്രത്തിൽ തന്നെ ഒരു ജേഴ്സിക്ക് കിട്ടിയ റെക്കോർഡ് ലേലത്തുകയും ഇതുതന്നെ. 9.3 ദശലക്ഷം യുഎസ് ഡോളറിനാണ് ജേഴ്സി വിറ്റുപോയത്.

2026ലെ ലോകകപ്പിലും ഇം​ഗ്ലണ്ട്- അർജന്റീന പോരാട്ടം അരങ്ങേറിയിരുന്നു. ഇത്തവണ സെമിയിലാണ് മത്സരം നടന്നത്. ഇം​ഗ്ലണ്ടിനെ വീഴ്ത്തി അർജന്റീന വീണ്ടും കരുത്ത് കാട്ടി ഫൈനലിലേക്ക് മുന്നേറുകയും ചെയ്തു. മത്സരത്തിനു പിന്നാലെ ബ്രിട്ടനും അർജന്റീനയും തമ്മിൽ പതിറ്റാണ്ടുകളായി തുടരുന്ന ഫോക്ക്ലാൻഡ് ദ്വീപുകളുമായി ബന്ധപ്പെട്ട അവകാശ തർക്കങ്ങളും മത്സരത്തിനു രാഷ്ട്രീയ നിറവും നൽകിയിരുന്നു.