ലീഡ്‌സ്: ഇന്ത്യക്കെതിരായ ഒന്നാം ക്രിക്കറ്റ് ടെസ്റ്റില്‍ 371 റണ്‍സ് വിജയ ലക്ഷ്യത്തിലേക്ക് ഇംഗ്ലണ്ട് കരുത്തോടെ കുതിക്കുന്നു. ഓപ്പണര്‍ ബെന്‍ ഡക്കറ്റ് സെഞ്ച്വറിയുമായി സഹ ഓപ്പണര്‍ സാക് ക്രൗളി അര്‍ധ സെഞ്ച്വറിയുമായി കളം വാഴുന്നു. ഒന്നാം ഇന്നിങ്‌സില്‍ ഹീറോയായ ജസ്പ്രിത് ബുംറയടക്കമുള്ള ബൗളര്‍മാര്‍ ഇംഗ്ലീഷ് ഓപ്പണര്‍മാര്‍ സമര്‍ഥമായി നേരിട്ടു.
മഴയെ തുടർന്നു കളി നിർത്തുമ്പോൾ ഇംഗ്ലണ്ട് വിക്കറ്റ് നഷ്ടമില്ലാതെ 181 റൺസെന്ന നിലയിലാണ്. ഇംഗ്ലണ്ടിനു ജയിക്കാന്‍ വേണ്ടത് 190 റണ്‍സ് കൂടി. 10 വിക്കറ്റും കൈയിലുണ്ട്.
13 ഫോറുകള്‍ സഹിതമാണ് ഡക്കറ്റിന്റെ ആറാം ടെസ്റ്റ് സെഞ്ച്വറി. 98ല്‍ നിന്നു ഫോറടിച്ചാണ് ഡക്കറ്റ് സെഞ്ച്വറി പൂര്‍ത്തിയാക്കിയത്. 121 പന്തുകള്‍ നേരിട്ട് താരം (102) ശതകത്തിലെത്തി. നിലവിൽ ഡക്കറ്റ് 105 റൺസുമായി ബാറ്റിങ് തുടരുന്നു. ക്രൗളി 59 റണ്‍സുമായി മികച്ച പിന്തുണ നല്‍കി ഒപ്പമുണ്ട്.
ഇന്ത്യ ഒന്നാം ഇന്നിങ്‌സില്‍ 471 റണ്‍സും രണ്ടാം ഇന്നിങ്‌സില്‍ 364 റണ്‍സും നേടി. ഇംഗ്ലണ്ടിന്റെ ഒന്നാം ഇന്നിങ്‌സ് 465 റണ്‍സില്‍ അവസാനിച്ചു.
നേരത്തെ രണ്ടാം ഇന്നിങ്‌സില്‍ കെഎല്‍ രാഹുല്‍ (137), ഋഷഭ് പന്ത് (118) എന്നിവരുടെ സെഞ്ച്വറി മികവില്‍ ഇന്ത്യ 364 റണ്‍സാണ് സ്വന്തമാക്കിയത്. ഒന്നാം ഇന്നിങ്‌സിലെ 6 ലീഡടക്കമാണ് ഇന്ത്യ 371 റണ്‍സ് വിജയ ലക്ഷ്യം ഇംഗ്ലണ്ടിനു മുന്നില്‍ വച്ചത്.
സായ് സുദര്‍ശന്‍ (30), കരുണ്‍ നായര്‍ (20), രവീന്ദ്ര ജഡേജ (25) എന്നിവരാണ് രണ്ടക്കം കടന്ന മറ്റുള്ളവര്‍. ഒന്നാം ഇന്നിങ്‌സില്‍ സെഞ്ച്വറികള്‍ കണ്ടെത്തിയ ഓപ്പണര്‍ യശസ്വി ജയ്‌സ്വാള്‍ (4), ക്യാപ്റ്റന്‍ ശുഭ്മാന്‍ ഗില്‍ (8) എന്നിവര്‍ ക്ഷണത്തില്‍ മടങ്ങി. ഇന്ത്യയുടെ അവസാന മൂന്ന് ബാറ്റര്‍മാര്‍ പൂജ്യത്തിനു പുറത്തായി.
ഇംഗ്ലണ്ടിനായി ബ്രയ്ഡന്‍ കര്‍സ്, ജോഷ് ടോംഗ് എന്നിവര്‍ 3 വീതം വിക്കറ്റുകള്‍ വീഴ്ത്തി. ഷൊയ്ബ് ബഷീര്‍ രണ്ട് വിക്കറ്റെടുത്തു. ക്രിസ് വോക്‌സ്, ക്യാപ്റ്റന്‍ ബെന്‍ സ്റ്റോക്‌സ് എന്നിവര്‍ ഓരോ വിക്കറ്റെടുത്തു.
ഒന്നാം ഇന്നിങ്‌സില്‍ ഇംഗ്ലണ്ടിനായി ഒലി പോപ്പ് സെഞ്ച്വറി നേടി. താരം 106 റണ്‍സെടുത്തു. ഹാരി ബ്രൂക്ക് 99 റണ്‍സില്‍ പുറത്തായി. ബെന്‍ ഡക്കറ്റും അര്‍ധ സെഞ്ച്വറി നേടി. താരം 62 റണ്‍സെടുത്തു.
ഇന്ത്യക്കായി ജസ്പ്രിത് ബുംറയാണ് ബൗളിങില്‍ തിളങ്ങിയത്. താരം 5 വിക്കറ്റുകള്‍ വീഴ്ത്തി. പ്രസിദ്ധ് കൃഷ്ണ 3 വിക്കറ്റുകള്‍ നേടി. മുഹമ്മദ് സിറാജ് 2 വിക്കറ്റെടുത്തു.
England vs India: Ben Duckett and Zak Crawley have done exceedingly well to keep England ahead in the 1st Test match.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
