ക്രിസ്റ്റ്യാനോയുടെ ഫ്രീകിക്ക് കണ്ട് ഞെട്ടി ആരാധകർ, പോർച്ചു​ഗൽ കുപ്പായത്തിലെ ഏറ്റവും മോശം

യൂറോയ്ക്ക് മുൻപുള്ള സന്നാഹ മത്സരത്തിൽ 4-0ന് പോർച്ചു​ഗൽ ഇസ്രായേലിനെ വീഴ്ത്തി. സൂപ്പർ താരം ക്രിസ്റ്റ്യാനോയും ഇവിടെ ​ഗോൾ വല കുലുക്കി ഇസ്രായേലിനെ പ്രഹരിച്ചു. എന്നാൽ ഇവിടെ ക്രിസ്റ്റ്യാനോയിൽ നിന്ന് വന്ന ഫ്രീകിക്കാണ് ആരാധകരെ ഞെട്ടിച്ചത്. 

പോർച്ചു​ഗൽ കുപ്പായത്തിൽ ക്രിസ്റ്റ്യാനോയിൽ നിന്നും ത്രസിപ്പിക്കന്ന ഫ്രീകിക്കുകൾ കണ്ട ആരാധകർക്ക് പക്ഷേ ഇസ്രായേലിനെതിരെ യുവന്റ്സ് താരമെടുത്ത ഫ്രികിക്ക് കണ്ട് വിശ്വസിക്കാനായില്ല. ​ഗോൾ പോസ്റ്റിൽ നിന്ന് ഏറെ മാറി ഉയർന്ന് പോവുകയായിരുന്നു പന്ത്. ഫ്രീകിക്ക് എടുക്കാൻ തയ്യാറായി ക്രിസ്റ്റ്യാനോയ്ക്ക് സമീപം ബ്രൂണോ ഫെർണാണ്ടസ് നിൽക്കുന്നുണ്ടായിരുന്നെങ്കിലും ആ ഉത്തരവാദിത്വം ക്രിസ്റ്റ്യാനോ തന്നെ ഏറ്റെടുക്കുകയായിരുന്നു. 

പക്ഷേ സൂപ്പർ താരത്തിൽ നിന്ന് ആരാധകർ പ്രതീക്ഷിച്ച ഫലമല്ല അവിടെയുണ്ടായത്. ആ ഫ്രീ കിക്കിലെ നിരാശ ക്രിസ്റ്റ്യാനോയിലും പ്രകടമായിരുന്നു. ഫ്രീകിക്ക് മോശമായെങ്കിലും പിന്നാലെ ക്രിസ്റ്റ്യാനോ വല കുലുക്കി.ആദ്യ പകുതി അവസാനിക്കാനിരിക്കെയാണ് ക്രിസ്റ്റ്യാനോ തന്റെ രാജ്യാന്തര കരിയറിലെ 104ാം ​ഗോൾ സ്വന്തമാക്കിയത്. 

നിലവിലെ ചാമ്പ്യന്മാരായാ പോർച്ചു​ഗലിന് പക്ഷേ ഈ വർഷം കാര്യങ്ങൾ കടുപ്പമാണ്. മരണ ​ഗ്രൂപ്പായ ​ഗ്രൂപ്പ് ഡിയിൽ ജർമനി, ഫ്രാൻസ്, ഹം​ഗറി ടീമുകൾക്കൊപ്പമാണ് പോർച്ചു​ഗൽ. ജൂൺ 15ന് ഹം​ഗറിക്കെതിരായ മത്സരത്തോടെ പോർച്ചു​ഗൽ യൂറോ പോര് ആരംഭിക്കും. ജൂൺ 19ന് ജർമനിയേയും ജൂൺ 24ന് ഫ്രാൻസിനേയും നേരിടും.