കാന്സസ് സിറ്റി: ലോകകപ്പ് ഗ്രൂപ്പ് ജെയില് അള്ജീരിയയും ഓസ്ട്രിയയും തമ്മിലുള്ള ആവേശപ്പോരാട്ടം 3-3 എന്ന നാടകീയ സമനിലയില് അവസാനിച്ചതോടെ ഇരുടീമുകളും നോക്കൗട്ട് റൗണ്ടിലേക്ക് പ്രവേശനം ഉറപ്പിച്ചു. അള്ജീരിയന് നായകന് റിയാദ് മഹ്രസ് ഇരട്ട ഗോളുകളുമായി തിളങ്ങിയ മത്സരം അവസാന വിസില് വരെ ആവേശം നിറഞ്ഞതായി. പന്തടക്കത്തിലും പാസുകള് നല്കുന്നതിലും അള്ജീരിയന് സംഘം മുന്നിട്ടു നിന്നെങ്കിലും ശക്തമായ പ്രതിരോധവും തിരിച്ചടിയുമായി കളംനിറഞ്ഞ ഓസ്ട്രിയന് നിര സമനില പിടിക്കുകയായിരുന്നു.
മത്സരത്തിന്റെ ആദ്യഘട്ടത്തില് ഇരുടീമുകളും ആക്രമണ ഫുട്ബോള് പുറത്തെടുത്തതോടെ കളി വേഗത്തിലായി. ഗോളുകള് മാറിമാറി വന്നതോടെ മത്സരം ഒരുഘട്ടത്തിലും ഏകപക്ഷീയമായില്ല. ആദ്യ പകുതിയില് നേടിയ ഗോളുകള് ഓസ്ട്രിയയെ മുന്നിലെത്തിച്ചെങ്കിലും അള്ജീരിയ പോരാട്ടവീര്യം കൈവിട്ടില്ല. രണ്ടാം പകുതിയില് തിരിച്ചടിച്ച അവര് മത്സരത്തിലേക്ക് ശക്തമായി മടങ്ങിയെത്തി.
അവസാന നിമിഷങ്ങളില് സംഭവിച്ചത് ലോകകപ്പ് ചരിത്രത്തിലെ ഏറ്റവും നാടകീയ നിമിഷങ്ങളിലൊന്നായി മാറി. അധികസമയത്തിന്റെ നാലാം മിനിറ്റില് റിയാദ് മഹ്രസ് വലകുലുക്കി അള്ജീരിയന് ടീമിനെ 3-2ന് മുന്നിലെത്തിച്ചു. ഗാലറിയില് ആരാധകര് ആഘോഷം തുടങ്ങുമ്പോള് മത്സരം അവസാനിച്ചുവെന്ന് പലരും കരുതി. എന്നാല് ഒരു മിനിറ്റിനുള്ളില് തന്നെ ഓസ്ട്രിയയുടെ സാസാ കലാജ്ഡ്സിച്ച് സമനില ഗോള് നേടി. 96-ാം മിനിറ്റിലെ ആ ഗോള് മത്സരത്തിന്റെ ഗതിയെ തന്നെ മാറ്റിമറിച്ചു.
അവസാന വിസില് മുഴങ്ങിയപ്പോള് ഇരു ടീമുകളും നോക്കൗട്ടില് പ്രവേശിച്ചെന്ന ആശ്വാസത്തോടെ മൈതാനം വിട്ടു. ഫലത്തോടെ ഓസ്ട്രിയ ഗ്രൂപ്പില് രണ്ടാം സ്ഥാനവും അള്ജീരിയ മികച്ച മൂന്നാം സ്ഥാനക്കാരായും അടുത്ത ഘട്ടത്തിലേക്ക് കടന്നു. ഇരുടീമുകളും അടുത്ത ഘട്ടത്തിലേക്ക് മുന്നേറുമ്പോള് മൂന്നു മത്സരങ്ങള് തോറ്റ ജോര്ദാനാണ് പുറത്തായത്. അര്ജന്റീന നേരത്തെ തന്നെ നോക്കൗട്ടില് പ്രവേശിച്ചിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
