ന്യൂയോര്ക്ക്: ലോകകപ്പ് ഫൈനലിന് മുന്നോടിയായി ന്യൂയോര്ക്കിലെ പ്രശസ്തമായ ടൈംസ് സ്ക്വയര് കൈയടക്കി അര്ജന്റീന ആരാധകര്. നിലവിലെ ചാംപ്യന്മാരായ അര്ജന്റീന കിരീടപ്പോരില് സ്പെയിനെ നേരിടാന് ഒരുങ്ങുന്നതിന് തൊട്ടുമുമ്പ്, ന്യൂയോര്ക്ക് നഗരത്തെ തങ്ങളുടെ പരമ്പരാഗത നീലയും വെള്ളയും ജേഴ്സികളാല് നിറച്ചിരിക്കുകയാണ് ആരാധകക്കൂട്ടം. ടൈംസ് സ്ക്വയറിനെ അക്ഷരാര്ത്ഥത്തില് ഒരു അര്ജന്റീനിയന് സ്റ്റേഡിയമാക്കി മാറ്റിയ ആരാധകരുടെ ആവേശ പ്രകടനത്തിന്റെ വിഡിയോ സമൂഹമാധ്യമങ്ങളില് വൈറലായിരിക്കുകയാണ്.
ന്യൂയോര്ക്കിലെ നിയോണ് പരസ്യബോര്ഡുകള്ക്ക് താഴെ തങ്ങളുടെ പ്രിയപ്പെട്ട ടീമിന്റെ ജേഴ്സിയണിഞ്ഞ്, പതാകകള് വീശിയും പാട്ടുകള് പാടിയും നൃത്തം ചെയ്തുമാണ് ആരാധകര് ഒത്തുകൂടിയത്. സ്റ്റേഡിയങ്ങളെ ഓര്മിപ്പിക്കുന്ന തരത്തിലുള്ള ആവേശം ടൈംസ് സ്ക്വയറിനെ പൂര്ണമായും നീലക്കടലാക്കി മാറ്റി. അര്ജന്റീനയുടെ പരമ്പരാഗത പ്രീ-മാച്ച് ആഘോഷമായ 'ബാന്ഡെറാസോ'യെ (banderazo) അനുസ്മരിപ്പിക്കുന്നതായിരുന്നു ഈ ഒത്തുകൂടല്.
ന്യൂജേഴ്സി സ്റ്റേഡിയത്തില് ഇന്നു രാത്രി നടക്കുന്ന ഫൈനല് മത്സരത്തില് സ്പെയിനാണ് അര്ജന്റീനയുടെ എതിരാളികള്. സെമിഫൈനലില് ഇംഗ്ലണ്ടിനെ ഒന്നിനെതിരെ രണ്ട് ഗോളുകള്ക്ക് തകര്ത്താണ് അര്ജന്റീന കലാശപ്പോരിന് യോഗ്യത നേടിയത്. മറുഭാഗത്ത് ടൂര്ണമെന്റിലുടനീളം മികച്ച ഫോമിലുള്ള സ്പെയിന് കടുത്ത വെല്ലുവിളിയാണ് ഉയര്ത്തുന്നത്. മുന് ജര്മ്മന് താരം ടോണി ക്രൂസ് ഉള്പ്പെടെയുള്ള പ്രമുഖര് സ്പെയിനാണ് ഇത്തവണ കിരീടസാധ്യത കല്പ്പിക്കുന്നത്. എങ്കിലും, മെസിയുടെയും സംഘത്തിന്റെയും തുടര്ച്ചയായ രണ്ടാം ലോകകപ്പ് കിരീടമെന്ന സ്വപ്നത്തിന് കരുത്തുപകരാന് ലോകമെമ്പാടുമുള്ള അര്ജന്റീന ആരാധകര് സജ്ജമായിക്കഴിഞ്ഞു എന്നതിന്റെ തെളിവാണ് ടൈംസ് സ്ക്വയറില് കണ്ട ഈ ജനസാഗരം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
