അർജന്റീന ടീമിലെ 'വെളുത്ത' മതിൽ: കറുത്ത വർഗക്കാരുടെ അസാന്നിധ്യത്തിന് പിന്നിലെ കറുത്ത ചരിത്രം

ഇത്തവണത്തെ ഫിഫ ലോകകപ്പിൽ മാറ്റുരയ്ക്കുന്ന 48 ടീമുകളിൽ കറുത്ത വർഗക്കാരായ കളിക്കാർ ഇല്ലാത്ത ഏക ടീം അർജന്റീനയാണ്. അയൽരാജ്യങ്ങളായ ബ്രസീൽ, ഉറുഗ്വേ തുടങ്ങിയ ടീമുകളുടെ വിജയങ്ങളിൽ കറുത്ത വർഗക്കാരായ താരങ്ങൾ നിർണായക പങ്ക് വഹിക്കുമ്പോൾ, അർജന്റീന ടീമിൽ മാത്രം എന്തുകൊണ്ട് ഈ വിഭാഗത്തിന് പ്രാതിനിധ്യമില്ല എന്നത് കാലങ്ങളായി ചർച്ച ചെയ്യപ്പെടുന്ന വിഷയമാണ്. ഇത് വെറുമൊരു യാദൃശ്ചികതയല്ല, മറിച്ച് അർജന്റീന എന്ന രാജ്യത്തിന്റെ ചരിത്രത്തിൽ ബോധപൂർവം നടന്ന ചില മാറ്റങ്ങളുടെ പ്രതിഫലനമാണ്.

കറുത്ത വർഗക്കാർ എവിടെപ്പോയി?

ഒരുകാലത്ത് അർജന്റീനയിലെ ജനസംഖ്യയുടെ വലിയൊരു ഭാഗം കറുത്ത വർഗക്കാരായിരുന്നു. 1778-ലെ കണക്കനുസരിച്ച് അർജന്റീനയിലെ ജനസംഖ്യയുടെ 37 ശതമാനവും കറുത്ത വർഗക്കാരായിരുന്നു. 1810-ൽ തലസ്ഥാനമായ ബ്യൂണസ് ഐറിസിലെ ജനസംഖ്യയുടെ മൂന്നിലൊന്ന് കറുത്ത അടിമകളായിരുന്നു. എന്നാൽ പത്തൊമ്പതാം നൂറ്റാണ്ടിന്റെ അവസാനത്തോടെ ഈ ജനവിഭാഗം ചരിത്രത്തിൽ നിന്ന് തന്നെ മായ്ക്കപ്പെട്ടു. ഇതിന് പ്രധാനമായും മൂന്ന് കാരണങ്ങളാണ് ചരിത്രകാരന്മാർ ചൂണ്ടിക്കാട്ടുന്നത്:

1. യുദ്ധങ്ങൾ: അർജന്റീനയുടെ സ്വാതന്ത്ര്യ സമരങ്ങളിലും പരാഗ്വേയ്‌ക്കെതിരായ യുദ്ധങ്ങളിലും (Triple Alliance War) കറുത്ത വർഗക്കാരായ പുരുഷന്മാരെ മുൻനിരയിൽ പടയാളികളായി ഉപയോഗിച്ചു. ഇത് ആ വിഭാഗത്തിലെ പുരുഷന്മാരുടെ എണ്ണം ഗണ്യമായി കുറയാൻ കാരണമായി.

2. മഞ്ഞപ്പനി (Yellow Fever): 1871-ൽ ബ്യൂണസ് ഐറിസിലുണ്ടായ അതിഭീകരമായ മഞ്ഞപ്പനി പടർന്നുപിടിച്ചത് ദരിദ്രരായ കറുത്ത വർഗക്കാർ താമസിച്ചിരുന്ന മേഖലകളിലായിരുന്നു. കൃത്യമായ ചികിത്സയോ സൗകര്യങ്ങളോ ഇല്ലാതെ ഈ രോഗം ആ ജനവിഭാഗത്തെ തകർത്തു.

3. ബോധപൂർവമായ 'വെളുപ്പിക്കൽ' നയം (Whitening Policy): അർജന്റീനയെ ഒരു യൂറോപ്യൻ രാജ്യമാക്കി മാറ്റാൻ ആഗ്രഹിച്ചിരുന്ന ഭരണാധികാരികൾ ബോധപൂർവം കറുത്ത വർഗക്കാരെ ചരിത്രത്തിൽ നിന്നും ജനസംഖ്യയിൽ നിന്നും ഒഴിവാക്കാൻ ശ്രമിച്ചു. അന്നത്തെ പ്രസിഡന്റായിരുന്ന ഡൊമിംഗോ ഫോസ്റ്റിനോ സർമിയന്റോ യൂറോപ്യൻ കുടിയേറ്റത്തെ പ്രോത്സാഹിപ്പിക്കുകയും കറുത്ത വർഗക്കാരെ പാർശ്വവൽക്കരിക്കുകയും ചെയ്തു.

അർജന്റീന ടീമിലെ കറുത്ത താരങ്ങൾ

അർജന്റീന ടീമിൽ കറുത്ത വർഗക്കാർ കളിച്ചിട്ടേയില്ല എന്ന ധാരണ തെറ്റാണ്. എന്നാൽ അവരുടെ എണ്ണം വിരലിലെണ്ണാവുന്നത്ര കുറവാണ്:

*അലജാന്ദ്രോ ഡെലോ സാന്റോസ് (Alejandro De Los Santos): 1920കളിൽ അർജന്റീനയുടെ ദേശീയ ടീമിൽ കളിച്ച ആദ്യത്തെ കറുത്ത വർഗക്കാരനാണ് ഇദ്ദേഹം. ഫോർവേഡ് പൊസിഷനിൽ കളിച്ചിരുന്ന അദ്ദേഹം ടീമിനായി അഞ്ച് മത്സരങ്ങൾ ബൂട്ടു കെട്ടിയിട്ടുണ്ട്.

*ഹെക്ടർ ബാലി (Hector Baley): 1978-ൽ ലോകകപ്പ് നേടിയ അർജന്റീന ടീമിലെ ഗോൾകീപ്പറായിരുന്നു ഇദ്ദേഹം. എന്നാൽ ഫസ്റ്റ് ചോയ്സ് ഗോൾകീപ്പർ അല്ലാതിരുന്നതിനാൽ അദ്ദേഹത്തിന് കളത്തിൽ ഇറങ്ങാൻ അവസരം ലഭിച്ചിരുന്നില്ല. ആഫ്രിക്കൻ വംശജനായ (Mulato) കളിക്കാരനായി അദ്ദേഹം അറിയപ്പെടുന്നു.

മായ്ച്ചുകളയാത്ത പൈതൃകം

കറുത്ത വർഗക്കാരെ ജനസംഖ്യയിൽ നിന്ന് ഒഴിവാക്കിയെങ്കിലും അർജന്റീനയുടെ സംസ്കാരത്തിൽ അവരുടെ സ്വാധീനം ഇപ്പോഴും നിലനിൽക്കുന്നു. അർജന്റീനയുടെ അഭിമാനമായ ടാങ്കോ' (Tango) നൃത്തത്തിന്റെ വേരുകൾ ആഫ്രിക്കൻ വംശജരിൽ നിന്നുള്ളതാണ്. അതുപോലെ 'കാൻഡോംബെ' (Candombe) എന്ന സംഗീത രൂപവും കറുത്ത വർഗക്കാരുടെ പൈതൃകമാണ്.

ഇന്ന് അർജന്റീനയിൽ കറുത്ത വർഗക്കാർ ഇല്ല എന്ന് പറയുന്നത് ഒരു ഔദ്യോഗിക ഭാഷ്യമാണെങ്കിലും, കറുത്ത വംശപരമ്പരയെ വെളുത്ത വർഗക്കാരിലേക്ക് ലയിപ്പിക്കുകയാണ് (assimilation) യഥാർത്ഥത്തിൽ സംഭവിച്ചത്. "ആഫ്രിക്കൻ മരം വെളുത്ത പൂക്കൾ ഉൽപാദിപ്പിക്കുന്നു" എന്നാണ് ഇതിനെക്കുറിച്ച് ഒരുകാലത്ത് വിശേഷിപ്പിക്കപ്പെട്ടിരുന്നത്. വംശീയമായ ഈ ഏകതാനത (Racial homogeneity) ഫുട്ബോൾ ടീമിലും പ്രതിഫലിക്കുന്നു എന്നതാണ് നിലവിലെ സാഹചര്യം.