28ാം വയസിൽ അവസാനിച്ച കരിയർ, ഇം​ഗ്ലണ്ടിന്റെ ആദ്യ കറുത്ത വർ​ഗക്കാരൻ പേസർ; ഡേവിഡ് 'സിഡ്' ലോറൻസ് അന്തരിച്ചു

ലണ്ടൻ: ബ്രിട്ടനിൽ ജനിച്ച് ഇം​ഗ്ലണ്ട് ടീമിൽ കളിച്ച ആദ്യ കറുത്ത വർ​ഗക്കാരനായ പേസ് ബൗളർ ഡേവിഡ് സിഡ് ലോറൻസ് അന്തരിച്ചു. അദ്ദേഹത്തിന് 61 വയസായിരുന്നു. ഇം​ഗ്ലണ്ട് ക്രിക്കറ്റ് ടീമിന്റെ പേസ് ബൗളിങ് മാർ​ഗദർശിയായി അറിയപ്പെടുന്ന അദ്ദേഹം ​ഗ്ലോസ്റ്റർഷെയർ താരവുമാണ്.

പരിക്കിനെ തുടർന്നു 28ാം വയസിൽ കരിയർ അവസാനിപ്പിക്കേണ്ടി വന്ന ഹതഭാ​ഗ്യനായ താരമായിരുന്നു സിഡ് ലോറൻസ്. പേശികളുടെ ചലനശേഷി നഷ്ടമാകുന്ന മോട്ടർ ന്യൂറോൺ രോ​ഗം (എംഎൻഡി) ഒരു വർഷം മുൻപ് അദ്ദേഹത്തിനു സ്ഥിരീകരിച്ചിരുന്നു.

1988-92ൽ ഇം​ഗ്ലണ്ടിനായി 5 ടെസ്റ്റുകൾ മാത്രമാണ് സിഡ് ലോറൻസ് കളിച്ചത്. ന്യൂസിലൻഡിനെതിരെ വെല്ലിങ്ടനിൽ അരങ്ങേറിയ ടെസ്റ്റ് പോരാട്ടത്തിന്റെ അവസാന ദിനത്തിൽ പന്തെറിയാൻ ഓടുന്നതിനിടെ വീണ് കാൽമുട്ടിനു പരിക്കേറ്റതാണ് അദ്ദേഹത്തിനു വിനയായത്.

മത്സരത്തിൽ അദ്ദേഹം 67 റൺസ് വഴങ്ങി 4 വിക്കറ്റുകൾ നേടി ഫോമിൽ നിൽക്കെയാണ് കളം വിടേണ്ടി വന്നത്. കൗണ്ടി പോരാട്ടത്തിൽ ​ഗ്ലോസ്റ്റർഷെയറിന്റെ സുപ്രധാന പേസറായിരുന്നു ഡേവിഡ് സിഡ്.

ജമൈക്കയിൽ നിന്നു ബ്രിട്ടനിലേക്ക് കുടിയേറിയവരാണ് ലോറൻസിന്റെ കുടുംബം. 17ാം വയസ് മുതൽ അദ്ദേഹം ​ഗ്ലോസ്റ്റർഷെയറിനായി കളിച്ച് തുടങ്ങിയിരുന്നു. അന്ന് സഹ പേസറും വെസ്റ്റ് ഇൻഡീസ് ഇതിഹാസവുമായ കോർട്നി വാൽഷിനൊപ്പമുള്ള അദ്ദേഹത്തിന്റെ അതിവേ​ഗ സ്പെല്ലുകൾ ഏറെ ശ്രദ്ധേയമായിരുന്നു. ക്ലബിനായി 280 മത്സരങ്ങൾ കളിച്ച് 625 വിക്കറ്റുകളും അദ്ദേഹം വീഴ്ത്തി. ക്ലബിന്റെ ആദ്യ കറുത്ത വർ​ഗക്കാരനായ അധ്യക്ഷനും ലോറൻസ് തന്നെ.