ധോനിയുടെ ഏഴാം നമ്പർ ജഴ്‌സി പിൻവലിക്കണമെന്ന് മുൻ ഇന്ത്യൻ താരം സാബ കരീം. താരം ഇന്ത്യൻ ക്രിക്കറ്റിന് നൽകിയ സംഭാവനകൾ പരിഗണിച്ച് അദ്ദേഹത്തോടുള്ള ആദരവായി ഏഴാം നമ്പർ ജഴ്‌സി പിൻവലിക്കണമെന്ന് സാബയുടെ അഭിപ്രായം.
"ധോനിയുടെ മാത്രമല്ല ഇന്ത്യയുടെ ഇതിഹാസ താരങ്ങൾ അണിഞ്ഞിരുന്ന ജേഴ്‌സി നമ്പറുകളെല്ലാം പിൻവലിക്കണം. അവരുടെ ജേഴ്‌സി നമ്പറുകൾ മറ്റാരും ഉപയോഗിക്കുന്നില്ലെന്നു ഉറപ്പാക്കണം. ഇങ്ങനെ ഇന്ത്യക്കായി മഹത്തായ സംഭാവനകൾ ചെയ്ത ക്രിക്കറ്റ് താരങ്ങളെ തിരിച്ചറിയാൻ കഴുയും. ഇതുവഴി അവർ നൽകിയ സംഭാവനകളെ നമ്മൾ ബഹുമാനിക്കുക കൂടിയാണ് ചെയ്യുന്നത്', സാബ പറഞ്ഞു.
ജൂലൈ ഏഴാം തിയ്യതി ജന്മദിനം ആഘോഷിച്ച ധോനിക്ക് സഹതാരങ്ങളും ആരാധകരുമടക്കം നിരവധിപ്പേർ ആശംസകൾ നേർന്നപ്പോഴാണ് ഇത്തരത്തിലൊരു അഭിപ്രായവുമായി സാബ രംഗത്തെത്തിയത്. സച്ചിൻ ടെണ്ടുൽക്കറുടെ 10ാം നമ്പർ ജഴ്‌സി ബിസിസി ഐ പിൻവലിച്ചിരുന്നു.
വിരമിച്ച ശേഷം ക്രിക്കറ്റുമായി ബന്ധപ്പെട്ട് അത്ര സജീവമല്ലെങ്കിലും ഇന്ത്യൻ ക്രിക്കറ്റ് ടീമിന് അദ്ദേഹം സേവനം ചെയ്യുന്നത് തുടരുമെന്നാണ് പ്രതീക്ഷയെന്നും സാബ കരീം പറഞ്ഞു. ചെന്നൈ സൂപ്പർ കിങ്‌സിലൂടെ അദ്ദേഹം നിരവധി യുവതാരങ്ങളെ വളർത്തിയിട്ടുണ്ട്. സംസ്ഥാന തലത്തിൽ യുവതാരങ്ങളെ നിരീക്ഷിക്കാനും കൃത്യമായ നിർദേശങ്ങൾ നൽകാനും ധോനിക്ക് കഴിഞ്ഞാൽ ഭാവി ഇന്ത്യൻ ടീമിന് ഏറെ ഗുണകരമായിരിക്കുമെന്നും സാബ കൂട്ടിച്ചേർത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
