ലൗഡര്‍ഹില്‍: ഇന്ത്യയും വെസ്റ്റ് ഇന്‍ഡീസും തമ്മിലുള്ള നാലാം ടി20 പോരാട്ടം ഇന്ന്. ഇന്ത്യന്‍ സമയം രാത്രി എട്ട് മണി മുതലാണ് പോരാട്ടം. ആദ്യ രണ്ട് മത്സരങ്ങളും വിന്‍ഡീസ് ജയിച്ചപ്പോള്‍ മൂന്നാം പോരാട്ടം സ്വന്തമാക്കി ഇന്ത്യ വിജയ വഴിയില്‍ തിരിച്ചെത്തിയിരുന്നു. ഇതോടെ ഇനിയുള്ള രണ്ട് മത്സരങ്ങള്‍ ഇരു ടീമുകള്‍ക്കും നിര്‍ണായകം. ഇന്ന് വിജയിച്ച് പരമ്പര ഉറപ്പിക്കാന്‍ വിന്‍ഡീസും മൂന്നാം പോരിലെ ജയം നല്‍കിയ ആത്മവിശ്വാസത്തില്‍ ഇന്ന് വിജയം പിടിച്ച് പരമ്പരയില്‍ ഒപ്പമെത്താന്‍ ഇന്ത്യയും ശ്രമിക്കുമ്പോള്‍ പോരാട്ടം ത്രില്ലറായി മാറും.
ഒപ്പണിങാണ് ഇന്ത്യയെ നിലവില്‍ കുഴക്കുന്ന പ്രധാന പ്രശ്‌നം. ശുഭ്മാന്‍ ഗില്ലിന്റെ ഫോം ഇല്ലായ്മയാണ് തലവേദന. കഴിഞ്ഞ മത്സരത്തില്‍ ഇഷാന്‍ കിഷനു വിശ്രമം നല്‍കി യശസ്വി ജയ്‌സ്വാളിനു അവസരം നല്‍കിയെങ്കിലും താരം തിളങ്ങിയില്ല. ഇന്ന് ഇഷാനെ ഇറക്കി ഗില്ലിനെ പുറത്തിരുത്തിയാലും അത്ഭുതമില്ല.
ഐപിഎല്ലില്‍ മിന്നും ഫോമില്‍ കളിച്ച ഗില്ലിനു ഈ പരമ്പരയില്‍ തിളങ്ങാന്‍ സാധിച്ചിട്ടില്ല. സ്‌കോര്‍ രണ്ടക്കം കടത്താനും താരത്തിനു ആയിട്ടില്ല. മൂന്ന്, ഏഴ്, ആറ് എന്നിങ്ങനെയാണ് ആദ്യ മൂന്ന് പോരിലും താരം നേടിയത്.
സൂര്യകുമാര്‍ യാദവ് ഫോമിലേക്ക് തിരിച്ചെത്തിയത് ഇന്ത്യക്ക് ആശ്വാസം നല്‍കുന്നു. കഴിഞ്ഞ പോരാട്ടത്തില്‍ ഇന്ത്യയെ ജയത്തിലേക്ക് നയിച്ചത് താരം 44 പന്തില്‍ എടുത്ത 83 റണ്‍സാണ്. തിലക് വര്‍മയുടെ മിന്നും ഫോമും ഇന്ത്യക്ക് കരുത്താണ്.
ബൗളിങ് വിഭാഗത്തില്‍ മുകേഷ് കുമാറിനു വിശ്രമം നല്‍കിയേക്കും. പകരം ഉമ്രാന്‍ മാലിക്, ആവേശ് ഖാന്‍ എന്നിവരില്‍ ഒരാള്‍ക്ക് അവസരം നല്‍കിയേക്കും. കുല്‍ദീപ് യാദവ്, യുസ്‌വേന്ദ്ര ചഹല്‍, അക്ഷര്‍ പട്ടേല്‍ എന്നിവര്‍ സ്ഥാനം നിലനിര്‍ത്തിയേക്കും.
മറുഭാഗത്ത് ക്യാപ്റ്റന്‍ റോവ്മന്‍ പവല്‍, നിക്കോളാസ് പുരന്‍ എന്നിവരുടെ ബാറ്റിങ് മികവാണ് വിന്‍ഡീസിന്റെ ബലം. മൂന്നാം മത്സരത്തില്‍ കളിക്കാന്‍ സാധിക്കാതിരുന്ന ജാസന്‍ ഹോള്‍ഡര്‍ ഇന്നു തിരിച്ചെത്തിയേക്കും.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
