കാന്റര്‍ബെറി: ഇംഗ്ലണ്ടിനെതിരായ ടെസ്റ്റ് പരമ്പരയ്‌ക്കൊരുങ്ങുന്ന ഇന്ത്യക്ക് കരുത്തായി എ ടീം താരങ്ങളുടെ (India A) ബാറ്റിങ് മികവ്. ഇംഗ്ലണ്ട് ലയണ്‍സിനെതിരായ ചതുര്‍ദിന ടെസ്റ്റ് സമനിലയില്‍ അവസാനിച്ചെങ്കിലും രണ്ടാം ഇന്നിങ്സില് ഇന്ത്യയുടെ നാല് മുന്‍നിര ബാറ്റര്‍മാരും അര്‍ധ സെഞ്ച്വറി നേടി. നാല് പേരും ഇന്ത്യയുടെ ഇംഗ്ലണ്ട് പരമ്പരയ്ക്കുള്ള ടീമില്‍ ഉള്‍പ്പെട്ടവരാണ്. നേരത്തെ ഒന്നാം ഇന്നിങ്സില് മലയാളി താരം കരുണ്‍ നായര്‍ ഇരട്ട സെഞ്ച്വറി നേടിയിരുന്നു. ഇടവേളയ്ക്ക് ശേഷം ഇന്ത്യന്‍ ടീമിലേക്ക് തിരിച്ചെത്തിയ കരുണ്‍ പ്ലെയിങ് ഇലവനിലേക്കുള്ള സാധ്യതയും ഇരട്ട സെഞ്ച്വറിയോടെ ഉയര്‍ത്തി.
ലീഡ് വഴങ്ങി രണ്ടാം ഇന്നിങ്സ് ബാറ്റിങിനിറങ്ങിയ ഇന്ത്യ 2 വിക്കറ്റ് നഷ്ടത്തില്‍ 241 റണ്‍സെടുത്തു നില്‍ക്കെ മത്സരം സമനിലയില്‍ അവസാനിച്ചു. ഇന്ത്യയുടെ ഒന്നാം ഇന്നിങ്സ് 557 റണ്‍സില്‍ അവസാനിപ്പിച്ച ലയണ്‍സ് ഒന്നാം ഇന്നിങ്സില് 587 റണ്‍സ് സ്വന്തമാക്കി. 30 റണ്‍സ് ലീഡാണ് അവര്‍ പിടിച്ചെടുത്തത്.
രണ്ടാം ഇന്നിങ്സില് ഓപ്പണര്‍ യശസ്വി ജയ്‌സ്വാള്‍ (64), ക്യാപ്റ്റന്‍ അഭിമന്യു ഈശ്വരന്‍ (68), ധ്രുവ് ജുറേല്‍ (പുറത്താകാതെ 53), നിതീഷ് കുമാര്‍ റെഡ്ഡി (പുറത്താകാതെ 52) എന്നിവര്‍ അര്‍ധ സെഞ്ച്വറി നേടി. ധ്രുവ് ജുറേല്‍ ആദ്യ ഇന്നിങ്‌സിലും അര്‍ധ സെഞ്ച്വറി (94) നേടിയിരുന്നു. യശസ്വി 60 പന്തില്‍ 8 ഫോറും 2 സിക്സും തൂക്കി. നിതീഷ് 40 പന്തില്‍ 5 ഫോറും 3 സിക്സും അടിച്ചു.
നേരത്തെ ഓപ്പണര്‍ ടോം ഹെയ്ന്‍സ്, നാലാമനായി എത്തിയ മാക്‌സ് ഹോള്‍ഡന്‍, ഏഴാമനായി ക്രീസിലെത്തിയ ഡാന്‍ മൗസ്ലി എന്നിവര്‍ സെഞ്ച്വറി നേടിയതാണ് ഇംഗ്ലണ്ടിനു കരുത്തായത്. ഹെയ്ന്‍സ് 171 റണ്‍സും മാക്‌സ് 101 റണ്‍സും മൗസ്ലി 113 റണ്‍സും കണ്ടെത്തി. എമിലിയോ ഗെ 46 റണ്‍സെടുത്തു മടങ്ങി.
ഇന്ത്യക്കായി മുകേഷ് കുമാര്‍ 3 വിക്കറ്റുകള്‍ വീഴ്ത്തി. ശാര്‍ദുല്‍ ഠാക്കൂര്‍ രണ്ട് വിക്കറ്റ് സ്വന്തമാക്കി. അന്‍ഷുല്‍ കാംബോജ്, ഹര്‍ഷ് ദുബെ, ഹര്‍ഷിത് റാണ, നിതീഷ് കുമാര്‍ റെഡ്ഡി, കരുണ്‍ നായര്‍ എന്നിവര്‍ ഓരോ വിക്കറ്റെടുത്തു.
ഒന്നാം ഇന്നിങ്സില് ഇന്ത്യക്കായി മലയാളി താരം കരുണ്‍ നായര്‍ ഇരട്ട സെഞ്ച്വറി നേടിയതാണ് നിര്‍ണായകമായത്. താരം 281 പന്തുകള്‍ നേരിട്ട് 26 ഫോറും ഒരു സിക്സും സഹിതം 204 റണ്‍സെടുത്തു പുറത്തായി. ഡബിള്‍ സെഞ്ച്വറി തികച്ച് അധികം താമസിയാതെ താരം മടങ്ങി.
ഒന്നാം ദിനത്തില്‍ സര്‍ഫറാസ് ഖാന് സെഞ്ച്വറി നഷ്ടമായപ്പോള്‍ രണ്ടാം ദിനത്തില്‍ ധ്രുവ് ജുറേലും സെഞ്ച്വറി വക്കില്‍ വീണു. ധ്രുവ് ജുറേല്‍ 94 റണ്‍സിനു പുറത്തായി. താരം 120 പന്തുകള്‍ പ്രതിരോധിച്ച് 11 ഫോറും ഒരു സിക്സും സഹിതമാണ് 94ല്‍ എത്തിയത്. രണ്ടാം ദിനത്തില്‍ ആദ്യ മടങ്ങിയതും ജുറേലാണ്. പിന്നാലെ വന്ന നിതീഷ് കുമാര്‍ റെഡിയും അധികം ക്രീസില്‍ നിന്നില്ല. താരം 7 റണ്‍സുമായി മടങ്ങി. ശാര്‍ദുല്‍ ഠാക്കൂര്‍ 27 റണ്‍സെടുത്തും പുറത്തായി.
സര്‍ഫറാസ് ഖാന് 92 റണ്‍സില്‍ പുറത്തായി. അര്‍ഹിച്ച സെഞ്ച്വറിയാണ് താരത്തിനു നഷ്ടമായത്. 13 ഫോറുകള്‍ സഹിതമാണ് ഇന്നിങ്സ്. ഓപ്പണര്‍മാരായ യശസ്വി ജയ്‌സ്വാള്‍ (24), ക്യാപ്റ്റന്‍ അഭിമന്യു ഈശ്വരന്‍ (8) എന്നിവരാണ് പുറത്തായ മറ്റുള്ളവര്‍.
വാലറ്റത്ത് ഹര്‍ഷ് ദുബെയും അന്‍ഷുല്‍ കാംബോജും നടത്തിയ പോരാട്ടമാണ് സ്‌കോര്‍ 500 കടത്തിയത്. ഹര്‍ഷ് ദുബെ 32 റണ്‍സും അന്‍ഷുല്‍ 23 റണ്‍സും കണ്ടെത്തി.
ഇംഗ്ലണ്ട് ലയണ്‍സിനായി ജോഷ് ഹള്‍, സമാന്‍ അക്തര്‍ എന്നിവര്‍ 3 വീതം വിക്കറ്റുകള്‍ വീഴ്ത്തി. എഡ്ഡി ജാക്ക് 2 വിക്കറ്റെടുത്തു. അജീത് സിങ് ഡെയ്ല്‍, എന്നിവര്‍ ഓരോ വിക്കറ്റ് സ്വന്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
