ആംസ്റ്റെല്വീന്: പുരുഷ ഹോക്കി ലോകകപ്പില് ഇന്ത്യയ്ക്ക് ഗംഭീര തുടക്കം. സ്വാതന്ത്യ ദിനത്തില് നടന്ന തങ്ങളുടെ ആദ്യ മത്സരത്തില് വെയില്സിനെ 3-1 എന്ന സ്കോറിനാണ് ഇന്ത്യ പരാജയപ്പെടുത്തിയത്. ക്യാപ്റ്റന് ഹര്മന്പ്രീത് സിങ്ങിന്റെ ഇരട്ട ഗോളുകളും സഞ്ജയുടെ തകര്പ്പന് പ്രകടനവുമാണ് ഇന്ത്യക്ക് അനായാസ ജയം സമ്മാനിച്ചത്. ജയത്തോടെ പൂള് ഡിയില് ഇന്ത്യ മുന്നിലെത്തി. തിങ്കളാഴ്ച ഇംഗ്ലണ്ടിനെതിരെയാണ് അടുത്ത മത്സരം. ഓഗസ്റ്റ് 19ന് പാകിസ്ഥാനെ നേരിടും.
നെതര്ലാന്ഡ്സിലെ വാഗനര് സ്റ്റേഡിയത്തില് നടന്ന മത്സരത്തില് തുടക്കം മുതല് തന്നെ ഇന്ത്യ വ്യക്തമായ ആധിപത്യം പുലര്ത്തി. എട്ടാം മിനിറ്റില് ലഭിച്ച പെനാല്റ്റി കോര്ണര് ഗോളാക്കി മാറ്റി സഞ്ജയാണ് ഇന്ത്യയുടെ അക്കൗണ്ട് തുറന്നത്. രണ്ട് മിനിറ്റിനുള്ളില്, അതായത് പത്താം മിനിറ്റില്, ഇന്ത്യയുടെ പെനാല്റ്റി കോര്ണര് സ്പെഷ്യലിസ്റ്റ് ഹര്മന്പ്രീത് സിങ് വീണ്ടും വെയില്സ് വല ചലിപ്പിച്ചതോടെ ലീഡ് 2-0 ആയി ഉയര്ന്നു.
43-ാം മിനിറ്റില് ഹര്മന്പ്രീത് തന്റെ രണ്ടാമത്തെ ഗോളും ഇന്ത്യയുടെ മൂന്നാം ഗോളും നേടിയതോടെ ഇന്ത്യ ജയം ഉറപ്പിച്ചു. എന്നാല് അവസാന ക്വാര്ട്ടറില് സാം വെല്ഷിലൂടെ ഒരു ഗോള് മടക്കി വെയില്സ് തോല്വിഭാരം കുറച്ചു. വിഡിയോ റിവ്യൂവിന് ശേഷമാണ് വെയില്സിന്റെ ഈ ഗോള് അനുവദിച്ചത്. ഇന്ത്യന് പ്രതിരോധം ഭേദിക്കാന് വെയില്സ് പലതവണ ശ്രമിച്ചെങ്കിലും ഗോള്കീപ്പര്മാരായ സൂരജ് കര്ക്കരയും മോഹിതും മികച്ച പ്രകടനത്തിലൂടെ അവരെ തടഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
