അഹമ്മദാബാദ്: വെസ്റ്റ് ഇന്ഡീസിനെതിരായ ഒന്നാം ക്രിക്കറ്റ് ടെസ്റ്റില് ക്യാപ്റ്റന് ശുഭ്മാന് ഗില്ലിന് അര്ധ സെഞ്ച്വറി. അര്ധ സെഞ്ച്വറിക്കു പിന്നാലെ താരം പുറത്താകുകയും ചെയ്തു. 94 പന്തുകള് നേരിട്ട് ക്യാപ്റ്റന് 50 റണ്സിലെത്തി. വിൻഡീസ് ക്യാപ്റ്റൻ റോസ്റ്റൻ ചെയ്സാണ് ഇന്ത്യൻ ക്യാപ്റ്റൻ ഔട്ടാക്കിയത്.
വിന്ഡീസിന്റെ ഒന്നാം ഇന്നിങ്സ് 162 റണ്സില് അവസാനിപ്പിച്ച് ഒന്നാം ദിനം തന്നെ ബാറ്റിങ് തുടങ്ങിയ ഇന്ത്യ 2 വിക്കറ്റ് നഷ്ടത്തില് 121 റണ്സെന്ന നിലയിലാണ് ഇന്നലെ കളി അവസാനിപ്പിച്ചത്. രണ്ടാം ദിനമായ ഇന്ന് നിലവില് ഇന്ത്യ 3 വിക്കറ്റ് നഷ്ടത്തില് 200 റണ്സെന്ന നിലയില്. നിലവില് ഇന്ത്യക്ക് 40 റണ്സ് ലീഡ്.
കെഎല് രാഹുല് ആദ്യ ദിനം തന്നെ അര്ധ സെഞ്ച്വറിയിലെത്തിയിരുന്നു. നിലവില് താരം സെഞ്ച്വറി വക്കിലാണ്. രാഹുല് 93 റണ്സുമായി ക്രീസില് നില്ക്കുന്നു.
യശസ്വി ജയ്സ്വാള് (54 പന്തില് 36), സായ് സുദര്ശന് (19 പന്തില് ഏഴ്) എന്നിവരാണ് ഇന്ത്യന് നിരയില് പുറത്തായത്. 68 റണ്സെടുത്തു നില്ക്കെ ഇന്ത്യയ്ക്ക് ആദ്യ വിക്കറ്റ് നഷ്ടമായി. ഓപ്പണര് യശസ്വി ജയ്സ്വാളാണ് ആദ്യം പുറത്തായത്. ജെയ്ഡന് സീല്സിന്റെ പന്തില് ഷായ് ഹോപ് ക്യാച്ചെടുത്താണ് യശസ്വി മടങ്ങിയത്. സ്കോര് 90ല് എത്തിയപ്പോള് ഇന്ത്യക്ക് രണ്ടാം വിക്കറ്റും നഷ്ടമായി. സായ് സുദര്ശനാണ് മടങ്ങിയത്. താരം 7 റണ്സ് മാത്രമാണ് കണ്ടെത്തിയത്. റോസ്റ്റന് ചെയ്സിന്റെ പന്തില് എല്ബിഡബ്ല്യു ആയാണ് സായ് മടങ്ങിയത്.
ടോസ് വിജയിച്ച് ബാറ്റിങ്ങിനിറങ്ങിയ വിന്ഡീസ് 44.1 ഓവറില് 162 റണ്സെടുത്ത് ഓള്ഔട്ടായി. 48 പന്തില് 32 റണ്സെടുത്ത ജസ്റ്റിന് ഗ്രീവ്സാണ് വെസ്റ്റിന്ഡീസ് നിരയിലെ ടോപ് സ്കോറര്. ഷായ് ഹോപ് (36 പന്തില് 26), റോസ്റ്റന് ചെയ്സ് (43 പന്തില് 24) എന്നിവരാണു വിന്ഡീസിന്റെ മറ്റു പ്രധാന സ്കോറര്മാര്. പേസര്മാരായ മുഹമ്മദ് സിറാജിന്റെയും ജസ്പ്രിത് ബുംറയുടേയും തകര്പ്പന് പ്രകടനമാണ് വിന്ഡീസിനെ തകര്ത്തെറിഞ്ഞത്. സിറാജ് നാലും ബുംറ മൂന്നും വിക്കറ്റുകള് വീഴ്ത്തി തിളങ്ങി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
