ജയിച്ച് തുടങ്ങി ചാമ്പ്യന്മാർ; ചെന്നൈയെ അഞ്ച് വിക്കറ്റിന് തകർത്ത് ഗുജറാത്ത് ടൈറ്റൻസ്

അഹമ്മദാബാദ്: ഐപിഎല്ലിലെ ഉദ്ഘടന പോരാട്ടത്തിൽ നിലവിലെ ചാമ്പ്യന്മാരായ ഗുജറാത്ത് ടൈറ്റൻസിന് ജയം. ചെന്നൈ സൂപ്പർ കിങ്‌സുമായുള്ള മത്സരത്തിൽ അഞ്ചുവിക്കറ്റ് വിജയമാണ് ടൈറ്റൻസ് സ്വന്തമാക്കിയത്. ആദ്യം ബാറ്റ് ചെയ്ത സിഎസ്കെ നിശ്ചിത ഓവറിൽ ഏഴ് വിക്കറ്റ് നഷ്ടത്തിൽ 178 റൺസ് കണ്ടെത്തി. 19.2 ഓവറിൽ നാല് പന്തുകൾ ബാക്കിനിൽക്കേ ഗുജറാത്ത് വിജയലക്ഷ്യം മറികടന്നു.

ടോസ് നേടി ഗുജറാത്ത് ബൗളിങ് തെരഞ്ഞെടുക്കുകയായിരുന്നു. ഗുജറാത്തിനായി ഓപ്പണർ ശുഭ്മാൻ ഗിൽ തകർപ്പൻ പ്രകടനം പുറത്തെടുത്തു. ആറ് ഫോറിന്റെയും മൂന്ന് സിക്സിന്റെയും സഹായത്തോടെ 36 പന്തുകളിൽ നിന്ന് 63 റൺസാണ് താരം അടിച്ചെടുത്തത്.‌ ഓപ്പണർ സാഹ 25 റൺസ് നേടി.  27 റൺസെടുത്ത വിജയ് ശങ്കറും തിളങ്ങി. രാഹുൽ തെവാത്തിയയും റാഷിദ് ഖാനും ചേർന്നാണ് അവസാന ഓവറുകളിൽ ടൈറ്റൻസിനെ വിജയത്തിലെത്തിച്ചത്. 

ആദ്യം ബാറ്റ് ചെയ്ത ചെന്നൈക്ക് 92 റൺസടിച്ചുകൂട്ടിയ ഓപ്പണർ റുതുരാജ് ഗെയ്ക്വാദിന്റെ തകർപ്പൻ പ്രകടനമാണ് മികച്ച സ്കോർ സമ്മാനിച്ചത്. 50 പന്തിൽ നിന്ന് 4 ഫോറും ഒൻപത് സിക്സുമടങ്ങുന്നതായിരുന്നു താരത്തിന്റെ ബാറ്റിങ്. മോയീൻ അലി 23, അമ്പാട്ടി റായ്ഡു 12, ശിവം ദുബെ 19 എന്നിങ്ങനെയാണ് മറ്റ് താരങ്ങളുടെ പ്രകടനം. ധോനി ഏഴ് പന്തിൽ നിന്ന് പുറത്താകാതെ 14 റൺസ് നേടി. ബൗളിങ്ങിൽ നിറം മങ്ങിയതാണ് ചെന്നൈക്ക് തിരിച്ചടിയായത്. 

ഈ വാര്‍ത്ത കൂടി വായിക്കൂ 

കോൺവെയെ ക്ലീൻ ബൗൾഡാക്കിയ തീയുണ്ട! ഐപിഎല്ലിൽ ശ്രദ്ധേയ നാഴികക്കല്ല് പിന്നിട്ട് മു​ഹമ്മദ് ഷമി (വീഡിയോ)

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ