അഹമ്മദാബാദ്: ഐപിഎല്ലില്‍ ചെന്നൈ സൂപ്പര്‍ കിങ്‌സിനെതിരെ ഗുജറാത്ത് ടൈറ്റന്‍സിന് 35 റണ്‍സ് വിജയം. ഗുജറാത്ത് ഉയര്‍ത്തിയ 232 റണ്‍സ് വിജയലക്ഷ്യം പിന്തുടര്‍ന്ന ചെന്നൈക്ക് 20 ഓവറില്‍ എട്ട് വിക്കറ്റ് നഷ്ടത്തില്‍ 196 റണ്‍സ് നേടാനെ കഴിഞ്ഞുള്ളു.
മറുപടി ബാറ്റിങ്ങില്‍ ചെന്നൈക്ക് വേണ്ടി ഡാരില്‍ മിച്ചലും (34 പന്തില്‍ 63) മൊയിന്‍ അലിയും (36 പന്തില്‍ 56) പൊരുതി യെങ്കിലും വിജയത്തിലെത്തിയില്ല. അവസാന ഓവറുകളിലെത്തി തകര്‍ത്തുകളിക്കുന്ന ധോനി ഇന്നും ഗാലറിയെ ആവേശത്തിലാഴ്ത്തി. 11പന്തില്‍ മൂന്ന് സിക്സും ഒരു ഫോറും സഹിതം 26 റണ്‍സുമായി പുറത്താവാതെ നിന്നു.
മുന്‍നിര താരങ്ങളെ തുടക്കത്തില്‍ തന്നെ നഷ്ടമായതാണ് ചെന്നൈ സൂപ്പര്‍ കിങ്‌സിനു തിരിച്ചടിയായത്. ഓപ്പണര്‍മാരായ അജിന്‍ക്യ രഹാനെ (ഒന്ന്), രചിന്‍ രവീന്ദ്ര (ഒന്ന്), ക്യാപ്റ്റന്‍ ഋതുരാജ് ഗെയ്ക്വാദ് (പൂജ്യം) എന്നിവര്‍ക്കു തിളങ്ങാന്‍ സാധിച്ചില്ല. പവര്‍പ്ലേയില്‍ മൂന്നു വിക്കറ്റ് നഷ്ടമായ ചെന്നൈയെ ഡാരില്‍ മിച്ചലും മൊയീന്‍ അലിയും ചേര്‍ന്നാണു നൂറു കടത്തിയത്. ശിവം ദുബെ (13 പന്തില്‍ 21), രവീന്ദ്ര ജഡേജ (10 പന്തില്‍ 18), എന്നിവരാണ് ചെന്നൈയുടെ മറ്റു പ്രധാന സ്‌കോറര്‍മാര്‍. ഗുജറാത്തിനായി മോഹിത് ശര്‍മ മൂന്നും റാഷിദ് ഖാന്‍ രണ്ടും വിക്കറ്റുകള്‍ വീഴ്ത്തി.
വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍
ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഗുജറാത്ത് 20 ഓവറില്‍ മൂന്നു വിക്കറ്റ് നഷ്ടത്തില്‍ 231 റണ്‍സാണു നേടിയത്. ശുഭ്മന്‍ ഗില്‍ 55 പന്തില്‍ 104 റണ്‍സും സായ് സുദര്‍ശന്‍ 51 പന്തില്‍ 103 റണ്‍സുമെടുത്തു പുറത്തായി. ഗില്‍ ആറു സിക്സും ഒന്‍പതു ഫോറുകളും ബൗണ്ടറി കടത്തിയപ്പോള്‍, സായ് ഏഴു സിക്സും അഞ്ച് ഫോറുകളും നേടി. മികച്ച തുടക്കമാണ് ഇരു താരങ്ങളും ചേര്‍ന്നു ഗുജറാത്തിനു നല്‍കിയത്. 50 പന്തുകളിലാണ് ഇരുവരും 100 തൊട്ടത്. 16.2 (98 പന്തുകള്‍) ഓവറുകളില്‍ സ്‌കോര്‍ 200 കടന്നു.
12 മത്സരങ്ങള്‍ പൂര്‍ത്തിയാക്കിയ ഗുജറാത്തിന്റെ അഞ്ചാം വിജയമാണിത്. ജയത്തോടെ പത്ത് പോയിന്റുമായി ഗുജറാത്ത് എട്ടാം സ്ഥാനത്തേക്കു കയറി. ആറാം തോല്‍വി വഴങ്ങിയെങ്കിലും ചെന്നൈ സൂപ്പര്‍ കിങ്‌സ് പോയിന്റ് പട്ടികയില്‍ നാലാം സ്ഥാനത്തുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
