​ഗോവയേയും തകർത്ത് ബ്ലാസ്റ്റേഴ്സ് ; അവസാന മത്സരത്തിൽ 2-1 ന്റെ വിജയം

കൊച്ചി: ഐഎസ്എൽ സീസണിലെ അവസാന മത്സരത്തിൽ എഫ്‌സി ഗോവയെ തകർ‌ത്ത് കേരള ബ്ലാസ്റ്റേഴ്സ്. ഒന്നിനെതിരെ രണ്ടു ​ഗോളുകൾക്കാണ് ബ്ലാസ്റ്റേഴ്സിന്റെ വിജയം. ജയത്തോടെ 13 മത്സരങ്ങളിൽ നിന്ന് 17 പോയിന്റുമായി ബ്ലാസ്റ്റേഴ്‌സ് എട്ടാം സ്ഥാനത്ത് ഫിനിഷ് ചെയ്തു. 20 പോയിന്റുമായി എഫ് സി ​ഗോവ ഏഴാം സ്ഥാനത്താണ്.

ഗോൾരഹിതമായ ആദ്യ പകുതിക്ക് ശേഷം 47ാം മിനിറ്റിലാണ് ഫ്രഞ്ച് താരം കെവിൻ യോക്കിലൂടെ ബ്ലാസ്‌റ്റേഴ്‌സ് മുന്നിലെത്തുന്നത്. ബോക്സിന്റെ ഇടത് ഭാഗത്തു കൂടി ഡ്രിബിൾ ചെയ്‌തുകയറി യോക്ക് ഉതിർത്ത ഷോട്ട് ഗോവ ഗോൾകീപ്പർക്ക് ഒരവസരവും നൽകാതെ വലയിലെത്തി. 61ാം മിനിറ്റിൽ മലയാളി താരം മുഹമ്മദ് നെമിൽ നേടിയ ​ഗോളിലൂടെ എഫ്‌സി ഗോവ സമനില പിടിച്ചു.

എന്നാൽ 80ാം മിനിറ്റിൽ കേരള ബ്ലാസ്റ്റേഴ്സ് കാത്തിരുന്ന വിജയ​ഗോളെത്തി. വലതു കോർണറിൽ നിന്നും ഫ്രാഞ്ചോ എടുത്ത മനോഹരമായ കോർണർ കിക്ക് പ്രതിരോധിക്കുന്നതിൽ സന്ദേശ് ജിംഗൻ പരാജയപ്പെട്ടു. പോസ്റ്റിന് മുന്നിൽ തക്കം പാർത്തിരുന്ന ഫാലോ വലതു കാലുകൊണ്ട് പന്ത് വലയിലേക്ക് തട്ടിയിട്ടു. അവസാന ആറു മത്സരങ്ങളും പരാജയപ്പെടാതെയാണ് ബ്ലാസ്റ്റേഴ്സ് സീസൺ അവസാനിപ്പിച്ചത്.