ദുബായ്: റോയല്‍ ചലഞ്ചേഴ്‌സ് ബാംഗ്ലൂര്‍ വിട്ടതിന് ശേഷം വിരാട് കോഹ് ലി ചേക്കേറാന്‍ പോരുന്ന ടീമിനെ പ്രവചിച്ച് സൗത്ത് ആഫ്രിക്കന്‍ മുന്‍ താരം ഡെയ്ല്‍ സ്റ്റെയ്ന്‍. ആര്‍സിബി വിട്ട ക്രിസ് ഗെയ്‌ലിന്റേയും മാഞ്ചസ്റ്റര്‍ യുനൈറ്റഡ് വിട്ട ഡേവിഡ് ബെക്കാമിന്റേയും പാത കോഹ് ലി പിന്തുടര്‍ന്നേക്കും എന്നാണ് ഡെയ്ല്‍ സ്റ്റെയ്ന്‍ പറയുന്നത്.
ഡല്‍ഹി ക്യാപിറ്റല്‍സിന് വേണ്ടി കളിച്ചായിരിക്കാം കോഹ് ലി ഐപിഎല്‍ കരിയര്‍ അവസാനിപ്പിക്കുന്നത് എന്നും സ്റ്റെയ്ന്‍ പറഞ്ഞു. എത്ര മികച്ച കളിക്കാരനാണ് നിങ്ങള്‍ എന്നത് ഒരു വിഷയമല്ല. പടിയിറങ്ങേണ്ടി വരും. ക്രിസ് ഗെയ്ല്‍ ടീം വിട്ടത് നമ്മള്‍ കണ്ടു. ഒരു ജീവിതകാലം മുഴുവന്‍ മാഞ്ചസ്റ്റര്‍ യുനൈറ്റഡിന് വേണ്ടി കളിച്ചതിന് ശേഷവും ഡേവിഡ് ബെക്കാം പടിയിറങ്ങി, സ്റ്റെയ്ന്‍ ചൂണ്ടിക്കാണിക്കുന്നു.
ഡല്‍ഹിക്കാരനാണ് കോഹ് ലി. ഞങ്ങള്‍ക്കൊപ്പം വന്ന് അവസാനിപ്പിക്കാന്‍ ഒരുപക്ഷേ ഡല്‍ഹി ക്യാപിറ്റല്‍സ് കോഹ് ലിയോട് പറയുമായിരിക്കും എന്നും സ്റ്റെയ്ന്‍ പറയുന്നു. ഈ സീസണോടെ റോയല്‍ ചലഞ്ചേഴ്‌സ് ബാംഗ്ലൂരിന്റെ ക്യാപ്റ്റന്‍ സ്ഥാനം ഒഴിയുമെന്ന് കോഹ്‌ലി വ്യക്തമാക്കിയിട്ടുണ്ട്.
എന്നാല്‍ ബാംഗ്ലൂരിനൊപ്പം കളിച്ച് സീസണ്‍ അവസാനിപ്പിക്കും എന്ന് പലപ്പോഴും കോഹ് ലി വ്യക്തമാക്കിയിട്ടുണ്ട്. 2013 മുതല്‍ ആര്‍സിബിയുടെ ക്യാപ്റ്റനാണ് കോഹ്‌ലി. 6000ന് മുകളില്‍ റണ്‍സ് ഇതിനോടകം കോഹ്‌ലി ഐപിഎല്ലില്‍ സ്വന്തമാക്കി കഴിഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
