പാരിസ്: ഫ്രഞ്ച് ലീഗ് വണിലെ കരുത്തരായ പാരിസ് സെന്റ് ജെര്‍മെയ്ന്‍ യൂറോപ്പിലെ എലൈറ്റ് കിരീടമായ യുവേഫ ചാമ്പ്യന്‍സ് ലീഗ് സ്വപ്‌നം കാണാന്‍ തുടങ്ങിയിട്ട് കാലങ്ങളായി. 2019-20 സീസണില്‍ അവര്‍ ചരിത്രത്തിലാദ്യമായി ഫൈനല്‍ വരെ എത്തിയെങ്കിലും ജര്‍മന്‍ കരുത്തരായ ബയേണ്‍ മ്യൂണിക്കിനോട് പരാജയപ്പെട്ട് നിരാശരായി. ചാമ്പ്യന്‍സ് ലീഗ് കിരീടം ലക്ഷ്യമിട്ട് എംബാപ്പെ, നെയ്മര്‍ തുടങ്ങിയ മികച്ച താരങ്ങളെ ടീമിലെത്തിച്ചാണ് അവര്‍ ഫൈനല്‍ വരെ മുന്നേറിയത്. പക്ഷേ അത് പൂര്‍ണ വിജയം കൈവരിച്ചില്ല. പിന്നാലെ മൊറീസിയോ പൊചെറ്റിനോയെ പരിശീലകനായി നിയമിച്ച് ഈ സീസണില്‍ കിരീടം സ്വന്തമാക്കുമെന്ന ഉറച്ച തീരുമാനമവുമായി അവര്‍ മുന്നോട്ട് പോകുന്നു.
ബാഴ്‌സലോണയില്‍ നിന്ന് ഇതിഹാസ താരം ലയണല്‍ മെസി പടിയിറങ്ങിയതോടെ താരം പിഎസ്ജിയിലേക്ക് എത്തുമെന്ന അഭ്യൂഹങ്ങള്‍ ശക്തമാണ്. മെസിയുടെ വരവ് ഏതാണ്ട് ഉറപ്പിച്ച മട്ടിലാണ് ഇപ്പോള്‍ വാര്‍ത്തകള്‍ പുറത്തു വരുന്നത്. ആരാധകരും ആ വരവിനായുള്ള കാത്തിരിപ്പിലാണ്. പിഎസ്ജിയുടെ ദീര്‍ഘ നാളായുള്ള സ്വപ്‌നത്തിന്റെ ഉത്തരമാണ് മെസിയെന്ന് ആരാധകര്‍ ഉറച്ചു വിശ്വസിക്കുന്നു. മെസിയുടെ പിഎസ്ജിയിലേക്കുള്ള വരവ് നിലവിലെ എല്ലാ ട്രാന്‍സ്ഫര്‍ റെക്കോര്‍ഡുകളേയും കടത്തി വെട്ടിയുള്ളതാകുമെന്നും റിപ്പോര്‍ട്ടുകളുണ്ട്.
മെസി പിഎസ്ജിയിലേക്ക് എത്തിയാല്‍ പക്ഷേ വലിയ തലവേദന അനുഭവിക്കാന്‍ പോകുന്നത് പരിശീലകന് പൊചെറ്റിനോ ആയിരിക്കും. തന്ത്രങ്ങള്‍ ഒരുക്കുന്നത് സംബന്ധിച്ച് വലിയ തലേേവദനയായിരിക്കും അര്‍ജന്റീന പരിശീലകനെ കാത്തിരിക്കുന്നത്. മെസി എത്തുമ്പോള്‍ നെയ്മര്‍, എംബാപ്പെ എന്നിവര്‍ക്കൊപ്പം മുന്നേറ്റത്തില്‍ അദ്ദേഹത്തെ കളിപ്പിക്കുമെന്ന് ഉറപ്പ്. എയ്ഞ്ചല്‍ ഡി മരിയ, മൊറോ ഇക്കാര്‍ഡി എന്നിവരും ബെഞ്ചിലുണ്ട്. ഇക്കാര്‍ഡ് ഷാര്‍പ്പ് ഷൂട്ടിങിന്റെ ആശാനായ മുന്നേറ്റക്കാരനാണ്. പൊചെറ്റിനോയുടെ പുതു തന്ത്രം എന്തായിരിക്കും എന്ന ആകാംക്ഷയിലാണ് ഫുട്‌ബോള്‍ പ്രേമികള്‍.
ഏറ്റവും പരിചിതമായ 4-3-3 ശൈലിയായിരിക്കും പൊചെറ്റിനോ പരീക്ഷിക്കുക എന്നാണ് പ്രതീക്ഷിക്കപ്പെടുന്നത്. മുന്നേറ്റത്തിന്റെ വലത് മെസി ഇടത് വശത്ത് നെയ്മര്‍ മധ്യത്തില്‍ എംബാപ്പെ. ബാഴ്‌സയില്‍ ഇത്തരമൊരു റോളില്‍ മെസി പല തവണയായി കളിച്ചിട്ടുണ്ട്.
മറ്റൊരു സാധ്യത 4-2-3-1 എന്നതാണ്. ഈ സ്‌റ്റൈലിലാണ് ടീമിനെ വിന്യസിപ്പിക്കുന്നത് എങ്കില്‍ ഡി മരിയ വലതു വശത്ത് സ്ഥാനം പിടിക്കുന്നു. മെസി ഒരു പ്ലേമേക്കറുടെ റോളില്‍ എംബാപ്പെയുടെ പിന്നില്‍ കളിക്കുകയും നെയ്മര്‍ വീണ്ടും ഇടതു വശത്ത് നിന്ന് ആക്രമിക്കുകയും ചെയ്യുന്നു. മാര്‍ക്കോ വെറാറ്റി, ലിവര്‍പൂളില്‍ നിന്ന് ഇത്തവണ പിഎസ്ജിയിലെത്തിയ വിനാല്‍ഡം എന്നിവരായിരിക്കും അപ്പോള്‍ മധ്യനിരയില്‍ കളിക്കുക.
മെസിയുടെ വരവ് സത്യത്തില്‍ പൊചെറ്റിനോയ്ക്ക് വലിയ സാധ്യതകളാണ് തുറന്നിടുന്നത്. അതിനെ മികച്ച രീതിയില്‍ മൈതാനത്ത് പരിവര്‍ത്തിപ്പിക്കാന്‍ സാധിച്ചാല്‍ പിഎസ്ജിയുടെ ചാമ്പ്യന്‍സ് ലീഗ് കിരീടമെന്ന സ്വപ്‌നം ഇത്തവണ പൂവണിയും. പക്ഷേ താരങ്ങളുടെ ബാഹുല്യം പരിശീലകന് വലിയ തലവേദനയായി മാറുമോ എന്നു കണ്ടറിയാം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
