മുംബൈ: ഐപിഎല്ലില്‍ പഞ്ചാബ് കിങ്‌സിനതെിരെ മുംബൈ ഇന്ത്യന്‍സിന് 199 റണ്‍സ് വിജയലക്ഷ്യം. നിശ്ചിത ഓവറില്‍ 5 വിക്കറ്റ് നഷ്ടത്തില്‍ പഞ്ചാബ് കിങ്‌സ് 198 റണ്‍സ് നേടി. ക്യാപ്റ്റന്‍ മയാങ്ക് അഗര്‍വാള്‍, ശിഖര്‍ ധവാന്‍ എന്നിവരുടെ ബാറ്റിങ് മികവാണ് വലിയ സ്‌കോറിലേക്കു പഞ്ചാബിനെ എത്തിച്ചത്. ഇരുവരും ചേര്‍ന്ന് 97 റണ്‍സാണു ഒന്നാം വിക്കറ്റ് കൂട്ടുകെട്ടില്‍ നേടിയത്.
ശിഖര്‍ ധവാനും മായങ്ക് അഗര്‍വാളും അര്‍ധ സെഞ്ച്വുറി നേടി. 32 പന്തില്‍ നിന്നാണ് മയങ്ക് അഗര്‍വാള്‍ 52 റണ്‍സ് നേടിയത്. ഇതില്‍ രണ്ട് സിക്‌സുകളും ആറ് ഫോറുകളും ഉള്‍പ്പെടുന്നു. മൂന്ന് സിക്‌സുകളും 5 ഫോറുകളും ഉള്‍പ്പടെ 50 പന്തില്‍ നിന്നാണ് ശിഖര്‍ ധവാന്റെ 70 റണ്‍സ് നേട്ടം.
സ്‌കോര്‍ 97 റണ്‍സില്‍ നില്‍ക്കെയാണ് പഞ്ചാബിന്റെ ആദ്യ വിക്കറ്റ് വീണത്. മുരുകന്‍ അശ്വിന്റെ പന്തില്‍ സൂര്യകുമാര്‍ യാദവ് ക്യാച്ചെടുത്ത് മയാങ്ക് പുറത്തായി. ജോണി ബെയര്‍സ്‌റ്റോ 12 റണ്‍സ് നേടി ജയ്‌ദേവ് ഉനദ്ഘട്ടിന്റെ പന്തില്‍ ബോള്‍ഡായി. ലിയാം ലിവിങ്സ്റ്റണ്‍ രണ്ട് റണ്‍സ് മാത്രമെടുത്തു മടങ്ങി. സ്‌കോര്‍ 150 കടത്തിയ ശേഷമാണ് ധവാന്‍ പുറത്തായത്. മലയാളി താരം ബേസില്‍ തമ്പിക്കായിരുന്നു വിക്കറ്റ്. ഷാറൂഖ് ഖാനെയും (ആറ് പന്തില്‍ 15) പുറത്താക്കി ബേസില്‍ തമ്പി വിക്കറ്റ് നേട്ടം രണ്ടാക്കി. 15 പന്തുകള്‍ നേരിട്ട ജിതേഷ് ശര്‍മ 30 റണ്‍സുമായി പുറത്താകാതെ നിന്നു.
ടോസ് നേടിയ മുംബൈ ഇന്ത്യന്‍സ് ബൗളിങ് തെരഞ്ഞെടുക്കുകയായിരുന്നു. മുംബൈയ്ക്കായി ബേസില്‍ തമ്പി രണ്ട് വിക്കറ്റ് വീഴ്ത്തി. നാല് ഓവറില്‍ 47 റണ്‍സാണ് ബേസില്‍ വിട്ടുനല്‍കിയത്. ആദ്യ നാലു മത്സരങ്ങള്‍ തോറ്റാണു മുംബൈ അഞ്ചാം പോരാട്ടത്തിനിറങ്ങുന്നത്. പഞ്ചാബ് ടീമില്‍ മാറ്റങ്ങളില്ല. പോയിന്റു പട്ടികയില്‍ ഏഴാം സ്ഥാനത്തുള്ള പഞ്ചാബ് കിങ്‌സിന് രണ്ട് ജയവും രണ്ടു തോല്‍വിയുമാണുള്ളത്.
ഈ വാര്‍ത്ത വായിക്കാം
സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
