മിലാന്‍: ഇറ്റാലിയന്‍ സീരി എ കിരീടം ഉറപ്പിച്ച് നാപോളി. ഉദിനീസിനെതിരായ മത്സരത്തില്‍ 1-1ന് സമനില പിടിച്ചാണ് അവര്‍ സീസണിലെ കിരീടം ഉറപ്പാക്കിയത്. അഞ്ച് മത്സരങ്ങള്‍ ശേഷിക്കെയാണ് സ്പല്ലെറ്റിയും സംഘവും ഇറ്റലിയിലെ പുതിയ ചാമ്പ്യന്‍മാരായി അവരോധിക്കപ്പെട്ടത്.
നാപോളിയുടെ ചരിത്രത്തിലെ മൂന്നാം സീരി എ കിരീടമാണിത്. നേരത്തെ ഇതിഹാസ താരം ഡീഗോ മറഡോണയുടെ സുവര്‍ണ കാലത്താണ് അവര്‍ രണ്ട് തവണ കിരീടത്തില്‍ മുത്തമിട്ടത്. 1986-87 സീസണിലും 1989-90 സീസണിലുമായിരുന്നു ഈ കിരീട നേട്ടങ്ങള്‍. 33 വര്‍ഷത്തെ കാത്തിരിപ്പിനാണ് നാപോളി വിരാമമിട്ടത്.
മത്സരത്തിൽ 13ാം മിനിറ്റിൽ സാൻഡി ലോവ്റിചിലൂടെ ഉദീനീസാണ് മുന്നിൽ കടന്നത്. രണ്ടാം പകുതിയിൽ വിക്ടർ ഒസിമെനിലൂടെ നാപോളി സമനില പിടിച്ചു. 52ാം മിനിറ്റിലായിരുന്നു താരത്തിന്റെ ഗോൾ.
33 മത്സരങ്ങളില്‍ നിന്ന് നിലവില്‍ 25 വിജയവും അഞ്ച് സമനിലകളും മൂന്ന് തോല്‍വിയുമായി 80 പോയിന്റുകള്‍ നാപോളിക്കുണ്ട്. ലാസിയോയാണ് രണ്ടാമതുള്ളത് ഇത്രയും മത്സരങ്ങളില്‍ നിന്ന് 64 പോയിന്റാണ് അവര്‍ക്കുള്ളത്. ഇനിയുള്ള അഞ്ച് മത്സരങ്ങള്‍ ജയിച്ചാലും ലാസിയോക്ക് നാപോളിയെ മറികടക്കാന്‍ സാധിക്കില്ല.
യുവന്റസ് മൂന്നാമതും ഇന്റര്‍ നാലാമതും നില്‍ക്കുന്നു. അറ്റ്‌ലാന്‍ഡയാണ് അഞ്ചാമത്. എസി മിലാന്‍ ആറാം സ്ഥാനത്തും റോമ ഏഴാം സ്ഥാനത്തും. അടുത്ത സീസണിലെ യുവേഫ ചാമ്പ്യന്‍സ് ലീഗ്, യൂറോപ്പ ലീഗുകളിലേക്കുള്ള സ്ഥാനങ്ങള്‍ക്കായി ഈ ആറ് വമ്പന്‍മാര്‍ തമ്മിലാണ് ഇനി പോരാട്ടം.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
