ലോസാന്: സ്വിറ്റ്സര്ലന്ഡിലെ ലോസാനില് നടന്ന ഡയമണ്ട് ലീഗ് മീറ്റില് ഇന്ത്യയുടെ ഒളിംപിക് ചാംപ്യന് നീരജ് ചോപ്ര വെള്ളി മെഡല് സ്വന്തമാക്കി. ആവേശകരമായ പോരാട്ടത്തില് കേവലം 9 സെന്റീമീറ്ററിന്റെ വ്യത്യാസത്തിലാണ് ശ്രീലങ്കന് താരം റുമേഷ് പതിരഗെയ്ക്ക് മുന്നില് നീരജിന് ഒന്നാം സ്ഥാനം നഷ്ടമായത്. സീസണിലെ ഏറ്റവും മികച്ച ദൂരമായ 88.05 മീറ്റര് കണ്ടെത്താന് നീരജിനായെങ്കിലും 88.14 മീറ്റര് ദൂരം എറിഞ്ഞ പതിരഗെ സ്വര്ണം സ്വന്തമാക്കി.
ആദ്യ ശ്രമത്തില് 83.54 മീറ്റര് എറിഞ്ഞ നീരജ്, രണ്ടാം ശ്രമത്തില് 88.05 മീറ്റര് ദൂരം കണ്ടെത്തി ഒന്നാം സ്ഥാനത്തേക്ക് കുതിച്ചെത്തി. തൊട്ടടുത്ത മൂന്നാം ശ്രമത്തില് 88.14 മീറ്റര് എറിഞ്ഞ് റുമേഷ് പതിരഗെ ഒന്നാം സ്ഥാനം തിരിച്ചുപിടിച്ചു. മൂന്നാം ശ്രമത്തില് 83.72 മീറ്ററും നാലാം ശ്രമത്തില് ഫൗളും വഴങ്ങിയ നീരജ് അഞ്ചാം ശ്രമം ഉപേക്ഷിച്ചു. അവസാന ശ്രമത്തില് 82.15 മീറ്റര് മാത്രമാണ് നീരജിന് എറിയാനായത്. 86.69 മീറ്റര് ദൂരം കണ്ടെത്തിയ ഗ്രെനഡയുടെ ആന്ഡേഴ്സണ് പീറ്റേഴ്സ് മൂന്നാം സ്ഥാനത്തെത്തി.
പരിക്കില് നിന്നും മുക്തനായി തിരിച്ചെത്തിയ ശേഷമുള്ള നീരജ് ചോപ്രയുടെ ഈ വര്ഷത്തെ മൂന്നാമത്തെ മാത്രം മത്സരമായിരുന്നു ഇത്. ദോഹ ഡയമണ്ട് ലീഗിലെ നാലാം സ്ഥാനവും കോമണ്വെല്ത്ത് ഗെയിംസിലെ വെള്ളി മെഡലിനും ശേഷമാണ് നീരജ് സീസണിലെ തന്റെ ഏറ്റവും മികച്ച ദൂരം സ്വിറ്റ്സര്ലന്ഡില് കുറിച്ചത്. 9 സെന്റീമീറ്ററിന്റെ വ്യത്യാസത്തിലാണ് രണ്ടാം സ്ഥാനത്തായതെന്ന് താന് അറിഞ്ഞില്ലെന്ന് തീരജ് മത്സരശേഷം പ്രതികരിച്ചു. എങ്കിലും 88 മീറ്ററിന് മുകളില് എറിയാന് കഴിഞ്ഞതില് സന്തോഷമുണ്ടെന്നും താരം പറഞ്ഞു.
ഡയമണ്ട് ലീഗില് ഹാട്രിക് തികച്ച റുമേഷ് പതിരഗെയും നീരജ് ചോപ്രയും അടുത്തതായി ഏറ്റുമുട്ടുന്നത് സെപ്റ്റംബര് 19ന് ആരംഭിക്കുന്ന ഏഷ്യന് ഗെയിംസിലാണ്. പാകിസ്ഥാന്റെ അര്ഷാദ് നദീം കൂടി എത്തുന്നതോടെ ഏഷ്യന് ഗെയിംസിലെ ജാവലിന് പോരാട്ടം കൂടുതല് ആവേശകരമാകും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
